Ալավերդին բռնազավթեցին. ի՞նչ է անելու Դանիել Իոաննիսյանը

Երեկ Ալավեիրդում ՔՊ-ի ու ոստիկանական ուժերի մասնակցությամբ գործող համայնքապետ Արկադի Թամազյանին պաշտոնանկ անելու ապօրինի գործընթացի և իշխանազավթման վերաբերյալ հայտարարությամբ էին հանդես եկել արևմտյան դրամաշնորհներով սնվող և ժողովդրավարական արժեքների համար պայքարող մի շարք ՀԿ-ներ։ 

«Ալավերդու համայնքապետին անվստահություն հայտնելու գործողությունների ուսումնասիրությունը և այդ մասին եղած հրապարակային աղբյուրները մեզ հիմք են տալիս հայտարարելու, որ ՀՀ պետական իշխանությունը և իշխող ՔՊ կուսակցությունը համառ ջանքեր են ներդրել ճնշումների և ահաբեկումների միջոցով իրականացնելու այդ պաշտոնանկությունը»,- իրենց հայտարարության մեջ նշել էին ՀԿ-ներն ու թվարկել իրենց պնդումները հիմնավորող մի շարք դրվագներ։ 

Այդ ՀԿ-ների ցանկում, սակայն, չգտանք ամենաակտիվներից մեկի՝ «Իրազեկ քաղաքացիների միավորում» ՀԿ-ի անունը։ Վերջինիս ծրագրերի համակարգող Դանիել Իոաննիսյանը Mediahub-ի հետ զրույցում ասաց, որ հայտարարության տարածման պահին իրենք դեռ ուսումնասիրություն էին կատարում, և չեն հասցրել միանալ։

Նրա խոսքով՝ Ալավերդու համայնքապետին նիստերի դահլիճ չթողնողը ոչ թե ՔՊ-ն էր, այլ ոստիկանությունը, և ոստիկանության այդ գործողությունները, ըստ Իոաննիսյանի, պարունակում են հանցակազմ՝ պաշտոնեական դիրքի չարաշահում, որի մասին իրենք հանցագործության մասին հաղորդում են պատրաստում։ 

-Իսկ ոստիկանությունն ինքնուրո՞ւյն է որոշել, որ պետք է չթողնի ավագանու անդամներին ներս, թե՞ ինչ-որ մեկի ցուցումով, ասենք՝ ՔՊ-ականների կամ գործադիր իշխանության։ 
-Դա արդեն հնարավոր կլինի պարզել՝ դատելով քննության ընթացքից։ Եթե քննությունն ընթանա նորմալ, ապա կարելի է ենթադրել, որ ոստիկանությունը նման ցուցում չուներ, եթե քննությունը գնա կոծկման տրամաբանության մեջ, ապա կարելի է ենթադրել, որ նման ցուցում ուներ։ 

-Ձեր կարծիքով՝ Հայաստանում ոստիկանությունը վերջին հինգ տարիներին ինքնուրո՞ւյն է նման իրավիճակներում գործում, նկատի ունեմ՝ քաղաքական գործընթացներում, թե՞ ինչ-որ ցուցումով։ 
-Հայաստանի ոստիկանությունը, ցավոք սրտի՝ միշտ, նկատի ունեմ՝ իր գոյության վերջին 105 տարիների ընթացքում գործել է քաղաքական իշխանության կա՛մ պատվերով, կա՛մ սիրաշահելու նպատակով։ 

-Ձեր կարծիքով, օրինակ, Նիկոլ Փաշինյանը կարո՞ղ էր ուղղակի կամ անուղղակի կերպով ցուցում տված լիներ ոստիկանությանը, որ նրանք նպաստեին իրենց ներկայությամբ այդ գործըթնացին։ 
-Ես նորից եմ ասում՝ Հայաստանի ոստիկանությունը միշտ կա՛մ քաղաքական պատվերով, կա՛մ քաղաքական իշխանությանը սիրաշահելու տրամաբանության մեջ է։ Այս անգամ Ալավերդիում ևս այդ երկուսից մեկն էր, թե որ մեկն էր՝ չգիտեմ։ Ես չեմ կարծում, որ ՔՊ-ն կարիք ուներ էս ոստիկանական շոուների, որովհետև ՔՊ-ն 14 ձայն ուներ, և իրենք ենթադրում եմ՝ պիտի շահագրգռված լինեին էս պրոցեսը առանց քաշքշուկների, առանց դեբոշների անելու, որովհետև իրենք ունեին էդ 14 մանդատը։ «Ապրելու երկիրը» կարող էր շահագրգռված լինել, որ լինեին «շուխուրներ» և «դեբոշներ», ՔՊ-ն շահագրգռված չէր, որովհետև ուներ 14 մանդատ։ Բայց շուխուրների և դեբոշների հիմնական մեղավորը ոչ թե «Ապրելու երկիրն» է, այլ ոստիկանությունը։

-Իսկ Դուք ՔՊ-ի կողմից այս պրոցեսը իշխանազավթում համարո՞ւմ եք։
 -Ձեր կարծիքով՝ եթե ՔՊ-ն ունի 14 ավագանու անդամ 27-ից, և համայնքի ղեկավար է ընտրում՝ ունենալով համայնքային ավագանու մեծամասնություն, դա իշխանազավթո՞ւմ է։ 

-Հաշվի առնելով, որ ՔՊ-ն ի սիզբանե ուներ 13 անդամ, իսկ մյուս անդամը «Ապրելու երկրից» պոկվել-անցել էր ՔՊ-ի կողմը՝ շահագրգռվելու կամ այլ գործարքի արդյունքում, ապա․․․ 
-Ես ասում եմ՝ եթե էդ մարդու տեղափոխվելը ՔՊ պայմանավորված է ինչ-որ ստվերային կամ ապօրինի գործարքով, օրինակ՝ իրեն բժշկական կենտրոնի տնօրեն նշանակելու խոստումով, որը առաջիկայում կտեսնենք՝ այդպե՞ս է, թե՞ այդպես չէ, կամ իր նկատմամբ ճնշմամբ, ապա դա, բնականաբար, խնդիր է։ Բայց եթե դա տեղի է ունեցել նրա արդյունքում, որ էդ մարդը տարաձայնություններ ուներ համայնքի ղեկավարի հետ, իսկ այդպիսի տարաձայնություններ ակնհայտորեն մենք տեսնում էինք շատ վաղուց, ապա էստեղ ոչ մի խնդիր չկա։ Նույն ձև, եթե վաղը Երևանի ավագանիում երեք ընդդիմաիր խմբակցությունները միավորվեն ու Տիգրան Ավինյանին իմփիչմենթ անեն և համայնքի այլ ղեկավար ընտրեն, ևս դրա մեջ որևիցե խնդիր չեմ տեսնում։

-Իսկ այս ամենը ՔՊ-ականների հայտարարած «ժողովրդավարության բաստիոնի» մեջ մտնո՞ւմ է, և այս ամենի մեջ միայն ոստիկանությո՞ւնն է մեղավոր, թե՞ մի քիչ էլ ՔՊ-ն իր մեղքի բաժինն ունի։ 
-Ոստիկանությանը ո՞վ է ձևավորում, հո «Լուսավոր Հայաստանը» կամ Կոմունիստական կուսակցությո՞ւնը չի ձևավորում։ Իսկ ի՞նչ ենք հասկանում «ժողովրդավարության բաստիոն» ասելով։ Եթե «ժողովրդավարության բաստիոն» ասելով հասկանում ենք, որ Հայաստանն ավելի ժողովրդավար երկիր է, քան իր բոլոր հարևանները։ Եվ էդ տրամաբանության մեջ Հայաստանը բաստիոն է, ապա այո՝ Հայաստանն ավելի ժողովրդավար է, քան Թուրքիան, Ադրբեջանը, Վրաստանը կամ Իրանը։ 

-Իսկ այդ՝ ավելի ժողովրդավարի մեջ այսպիսի գործընթացները տեղավորվո՞ւմ են։ 
-Բնականաբար այդ գործընթացները խնդրահարույց են։ 

Վահե Մակարյան