Դեռ որոշ ժամանակ առաջ «Դիմադրության» շարժման ներկայացուցիչների կազմակերպած խաղաղ անհնազանդությունների ժամանակ ԱԺ պաշտպանության և անվտանգության հարցերի մշտական հանձնաժողովի նախագահ, իշխող խմբակցության պատգամավոր Անդրանիկ Քոչարյանը կոչ արեց ՀՀ պաշտպանության նախարարությանը` բողոքի խաղաղ ակցիայի մասնակիցների ցանկը վերցնել ոստիկանությունից և եռամսյա վարժական հավաքներից ու պարտադիր զինվորական ծառայությունից խուսափած քաղաքացիներին ընդգրկել եռամսյա վարժական հավաքներում։
ԱԺ մարդու իրավունքների պաշտպանության և հանրային հարցերի մշտական հանձնաժողովը այս օրերին ստացել է ահազանգեր, որ առաջիկա եռամսյա հավաքներին մասնակցելու համար հետևողականորեն ծանուցվում են ընդդիմության` վերջին ամիսների խաղաղ անհնազանդության ակցիաների մասնակիցներ: Ծանուցում է ուղարկվել օրինակ «Հայաստան» խմբակցության պատգամավոր Գեղամ Մանուկյանի՝ կալանքի տակ գտնվող որդուն, ցույցերին ակտիվ մասնակցող դաշնակցական Գևորգ Մուրադյանին, որը նույնպես բանտում է, ՀՅԴ «Նիկոլ Աղբալյան» ուսանողական միության նախագահ Տարոն Ղազարյանի բնակարանի հասցեով և այսպես շարունակ:
Տվյալի առնչությամբ MediaHub.am-ը կապ հաստատեց «Քաղաքացիական պայմանագիր» խմբակցության պատգամավոր Հովիկ Աղազարյանի հետ։ «Զորահավաքներն անց են կացվում Պաշտպանության նախարարության կողմից սահմանված կարգով և այնտեղ չեն նայում` ով է ընդդիմադիր և ով` ոչ ընդդիմադիր։ Անդրանիկ Քոչարյանը այդ արտահայտությունը, որ արել է, ասել է լրիվ այլ քաղաքական իմաստով»,- ճշտող հարցին՝ այդ դեպքում, ի՞նչ է նկատի ունեցել Քոչարյանը, Աղազարյանը պատասխանեց․ «Նա նկատի է ունեցել, որ հայրենիքը պաշտպանում են սահմանին։ Իսկ ծանուցման հետ կապված ընդդիմության շարքերում կան մարդիկ, որոնք համապատասխանում են զորահավաքի տարիքային խմբին, հետևաբար, հնարավոր է ծանուցվեն»։
Ինչպես հայտնում են ԱԺ մարդու իրավունքների պաշտպանության և հանրային հարցերի մշտական հանձնաժողովից, շատ են քաղաքացիների դժգոհությունները, որ հեռախոսազանգի միջոցով զինկոմիսարիատի աշխատակից ներկայացած անձը քաղաքացուն կանչում է ինչ-որ տվյալներ հայտնելու, քաղաքացին հետաքրքրվում է, թե արդյոք գաղտնի տեղեկություն է տրամադրելու՞, թե ոչ, որպեսզի օպերատիվ կերպով՝ հեռախոսազանգի միջոցով պատասխանելու հնարավորությունը հստակեցնի։ Ի պատասխան՝ զինկոմիսարիատից հայտնում են, որ ընթացիկ թարմացումներ են, ոչինչ ավելի։ Քաղաքացիների մի մասը տեղեկացրել է, որ ամեն դեպքում գնացել են զինկոմիսարիատ, սակայն այնտեղ ոչ թե ընթացիկ ստուգումներ են եղել, այլ իրենց ծանուցել են, որ ներգրավվում են վարժական հավաքներում։
Սակայն քաղաքացիների մյուս մասն էլ, տեղյակ լինելով օրենքի կարգավորումներին, որ հեռախոսազանգի միջոցով զորահավաքի մասնակցին զինկոմիսարիատ կանչելը միանշանակ չի կարող համարվել պատշաճ ծանուցում, քանի որ օրենքով ծանուցման նման կարգ սահմանված չէ, հրաժարվել է գնալ զինկոմիսարիատ, ինչը որոշ դեպքերում լարում է առաջացրել: Այս առնչությամբ Հովիկ Աղազարյանը նշեց, որ չի կարծում, որ հնարավոր է նման դեպք լինի․ «Եթե որևէ մեկին զանգով ծանուցում են ուղարկել, թող դիմի ինձ, ամենայն լրջությամբ և խորությամբ կպաշտպանեմ իր շահերը և տվյալ զինվորական մասնագետին կամ ծառայողին կդնեմ իր անհրաժեշտ տեղը։ Ես չեմ ասում, որ չեն եղել նման դեպքեր կամ չարաշահումներ, դա, իհարկե, ընդունված կարգի խախտում է, եթե լինում են այդպիսի ահազանգեր, ապա պետք է համապատասխան ձևով, համապատասխան մարմինները ընթացք տան։ Եթե իմ ընտրողներից որևէ մեկը զանգի ինձ տեղյակ պահի, որ նման բան է տեղի ունեցել, ես, որպես պատգամավոր, պարտավոր եմ հետամուտ լինել՝ պարզելու հանգամանքները, հետևաբար, ոչ թե բացառում եմ նման բաները, այլ ասում եմ՝ թող բարի լինեն, տեղյակ պահեն, իսկ եթե դեռ չեն ասել, դա ես համարում եմ պարզապես խոսակցություններ, քանի որ դա սահմանաված կարգով օրենքի խախտում է հանդիսանում, որի ժամանակ նշանակվում է ծառայողական քննություն»,-հավելեց Աղազարյանը։
Մերի Գևորգյան