Աֆղանստանն ու Ռուսաստանը պայմանավորվածություն են ձեռք բերել նավթի եւ գազի առք ու վաճառքի վերաբերյալ, հայտնում է Առեւտրի եւ արդյունաբերության նախարարությունը եւ հավելում, որ համաձայնագիրը շուտով կստորագրվի, գրում է TOLO News-ը։
Առեւտրի եւ արդյունաբերության նախարարի պաշտոնակատար Նուրուդին Ազիզին, ով նոր է վերադարձել Ռուսաստանից, տեղեկացրել է, որ աֆղանական եւ ռուսական բանկերի մեծ մասը պատժամիջոցների տակ են գտնվում, եւ գումարը կփոխանցվի երրորդ երկրի միջոցով:
«Մեր տեխնիկներից ոմանք դեռեւս Ռուսաստանում են եւ ցանկանում են մանրամասներ մշակել, թե ինչ տեսակի դրամական փոխանցումներ կարող ենք անել»,- հավելել է նա։
Առեւտրի եւ արդյունաբերության ներկայիս նախարարը, Ռուսաստան կատարած այցի ընթացքում, հանդիպել է Թաթարստանի Հանրապետության ղեկավարի հետ։
«Մենք պաշտոնական հրավեր ենք ուղարկել Թաթարստանի ղեկավարին՝ այցելելու Աֆղանստան։ Նրանք պատրաստ են ընդունել մեր հրավերը, եւ կարող են դա անել մոտ ապագայում։ Հենց որ նրանք հասնեն Աֆղանստան, մենք մի քանի պաշտոնական համաձայնագրեր կստորագրենք»,- ասել է Ազիզին։
Ռուսաստանից Աֆղանստան նավթի առաքումը խոչընդոտվել է ռուսական տարբեր բանկերի նկատմամբ կիրառվող պատժամիջոցների հետեւանքով: Առեւտրի եւ ներդրումային պալատի տվյալներով՝ դրա արդյունքում Քաբուլի եւ Մոսկվայի միջեւ ապրանքաշրջանառության ծավալը նվազել է։
Առեւտրի եւ ներդրումային պալատից հայտնել են, որ ռուսական ապրանքները, մասնավորապես ցորենն ու նավթը, ավելի էժան են, քան այլ երկրների ապրանքները։