Տնտեսագետների հարցման համաձայն, որն իրականացրել է Reuters-ը, Գերմանիայի տնտեսությունը կկրճատվի երեք եռամսյակ անընդմեջ՝ սկսած ընթացիկից, գազի գների բարձրացումից հետո, քանի որ Ռուսաստանը դադարեցրել է գազի մատակարարումները Եվրոպա։

Եվրոպայի ամենամեծ տնտեսությունը եւ արտադրական տերությունը ամենախոցելիներից մեկն է էներգակիրների մատակարարումների դադարեցման կամ գների բարձրացման առումով, քանի որ նրա արդյունաբերական հատվածը զգալիորեն կախված է ռուսական գազից։

Reuters-ի հարցումը, որն իրականացվել է օգոստոսի 29-սեպտեմբերի 1-ին, ցույց է տվել, որ Գերմանիայում երեք եռամսյակ անընդմեջ բացասական աճ է նկատվելու՝ գերազանցելով տեխնիկական ռեցեսիա սահմանումը, որի համար ընդամենը երկու եռամսյակ է պահանջվում։

Քանի որ եվրագոտու մեծ մասը պայքարում է էներգետիկ ճգնաժամի դեմ, հարցումը ենթադրում է, որ Գերմանիայի տնտեսությունը կկրճատվի 0,1 եւ 0,3 տոկոսով երրորդ եւ չորրորդ եռամսյակներում եւ 0,2 տոկոսով՝ հաջորդ տարվա առաջին եռամսյակում։

Դրանից հետո կանխատեսվում է տնտեսության աճ 0,4 տոկոսով երկրորդ եռամսյակում, որին կհետեւի 0,6 եւ 0,5 տոկոս աճ հաջորդ տարվա հաջորդ եռամսյակներում։

Միջինը սպասվում է, որ Գերմանիայի տնտեսության աճը կկազմի 1,5 տոկոս այս տարի, իսկ հետո կդանդաղի՝ 0,1 տոկոս հաջորդ տարի, վկայում են 34 տնտեսագետների միջին կանխատեսումները։

Էներգետիկ ճգնաժամն արդեն առաջ է բերել գազի մեծածախ գների 400 տոկոսանոց աճ վերջին տարում՝ վնաս հասցնելով էներգատար ճյուղերին՝ մետաղների արտադրությունից մինչեւ պարարտանյութերի արտադրություն։

Քանի որ գնաճը օգոստոսին ավելացել է մոտ 8,8 տոկոսով (50 տարվա առավելագույնն է), իսկ էլեկտրաէներգիայի աճող հաշիվները խափանում են տնային տնտեսությունների գնողունակությունը, ճնշումը Եվրոպական կենտրոնական բանկի վրա ուժեղանում է, որպեսզի նա դիմի տոկոսադրույքի ավելի զգալի բարձրացման։

Իսկապես, Reuters-ի վերջին հարցումը ցույց է տվել, որ տնտեսագետները ԵԿԲ-ի սեպտեմբերի 8-ի նիստում տարակարծիք են եղել 50 բազիսային կետով տոկոսադրույքը բարձրացնելու եւ 75 բազիսային կետի հասցնելու հարցում։ Բայց հիմա սպասելիքներն արագ կողմնորոշվում են ավելի բարձրացման կողմը։

Էլեկտրաէներգիայի աճող հաշիվները, երաշտը եւ ջրի ցածր մակարդակը խորացրել են եվրագոտու կյանքի արժեքի ճգնաժամը՝ կանխատեսելով ցավոտ ռեցեսիա ձմռանը, նշել է տեղեկատվական գործակալությունը։