«Microsoft»-ի հիմնադիր Բիլ Գեյթսը հորդորել է ԱՄՆ նախագահ Դոնալդ Թրամփին շարունակել արտաքին օգնություն տրամադրել ԱՄՆ Միջազգային զարգացման գործակալության՝ USAID-ի միջոցով։
Գեյթսն այս մասին խոսել է Սպիտակ տանը հանդիպման ժամանակ, հաղորդել է NBC-ն՝ «Microsoft»-ի հիմնադրի հարցազրույցից հետո։
ԱՄՆ կառավարության արդյունավետության նոր դեպարտամենտի (DOGE) ղեկավար և ձեռնարկատեր Իլոն Մասկը փետրվարի 2-ին ԱՄՆ ՄԶԳ-ն անվանել էր «հանցավոր կազմակերպություն»: Երկուշաբթի օրը Մասկը հայտնել էր, որ Թրամփը համաձայնել է փակել USAID-ը: Բացի այդ, DOGE-ի ղեկավարը պարզաբանել է, որ իրենք «արդեն գործակալության փակման գործընթացում են»։
«Գեյթսն ասել է, որ չորեքշաբթի օրը հանդիպել է Թրամփի հետ Սպիտակ տանը՝ պաշտպանելու ԱՄՆ ՄԶԳ-ի միջոցով արտաքին օգնության շարունակականությունը»,- հաղորդել է հեռուստաալիքը:
«Microsoft»-ի հիմնադիրը նշել է, որ դեռ պարզ չէ, թե ԱՄՆ-ն ինչպիսի արտաքին օգնություն է շարունակելու տրամադրել։ Նա հավելել է, որ ԱՄՆ-ի համար շատ դժվար կլինի վերստեղծել ԱՄՆ ՄԶԳ-ի նման որևէ բան: Կորպորացիայի հիմնադիրը հայտնել է, որ չի հանդիպել Մասկի հետ, ով եղել է գործակալության փակման նախաձեռնողը։