25 տարի ապրել եմ Քաշաթաղում, բայց ինձ փոխհատուցում չի տրվելու։ Այս մասին MediaHub.am-ի հետ զրույցում ասաց ազատամարտիկ Մհեր Մազմանյանը։
«Կառավարությունն անհասկանալի ձևաչափով որոշում ունի, որ եթե պատերազմից առաջ 3 ամիս ժամկետով բացակայել ես համայնքից, ապա փոխհատուցում չես ստանա։ Համընկել է՝ ես Երևան եմ գնացել եկել՝ քաղաքացիական ակտիվությամբ պայմանավորված։ Պատերազմը սկսելու հաջորդ իսկ օրը Քաշաթաղում եմ եղել»,-մանրամասնեց նա։
Մհեր Մազմանյանը մասնակցել է Արցախյան ազատամարտին, երբ դեռ 20 տարեկան էլ չէր։ 1996 թ-ին վերջնականապես տեղափոխվել է Քաշաթաղ, ապրել տարբեր բնակավայրերում՝ Աղավնո, Տանձուտ, Բերձոր, տեղափոխությունը կապված է եղել աշխատանքի հետ։
7 երեխա ունի՝ 5 որդի, 2 դուստր։ Մհեր Մազմանյանի խոսքով՝ ապագայում թե ինչ նոր զարգացումներ են սպասվում Արցախում հայտնի չէ։
«Թե՛ Հայաստանի և թե՛ Արցախի իշխանությունները չեն կարող ասել, որ Հայաստանին կապող տարանցիկ ճանապարհն անվտանգ է, չգիտենք՝ ինչ է սպասվում։ Չգիտենք՝ ի՞նչ է լինելու հիմնական միջանցքի հետ, որևէ մեկը չի կարող երաշխիքներ տալ՝ նույն խաղաղապահների հետ կապված կարող ենք հիշել Փառուխի դեպքերը»,-ասաց նա։ Մհեր Մազմանյանի խոսքով՝ ո՛չ Հայաստանում, ո՛չ Արցախում հանրության հետ կապը պահող իշխանություն չկա, տեղեկատվության առումով էլ անորոշություն է։
Անի Գևորգյան