Այսօր ԿԳՄՍ փոխնախարար Ժաննա Անդրեասյանը ֆեյսբուքյան գրառմամբ անդրադարձել էր հայտնի ձայնագրությանը, որում Երևանի 122 դպրոցի նախկին տնօրեն Մարինե Մալախյանը գումար էր պահանջում ուսուցչուհուց՝ աշխատանքի ընդունելու համար։ Հիշեցնենք, որ խոսքը 1500 դոլարի մասին էր։
«Ձայնագրության հիման վրա հիմա արդեն նախկին տնօրենը նախարարության կողմից զրկվեց հավաստագրից։ Արդեն ստացել ենք դատավճիռը, որով նախկին տնօրենը զրկվել է որոշակի պաշտոններ զբաղեցնելու և մանկավարժական գործունեություն ծավալելու իրավունքից։ Միջադեպի մյուս մասնակիցների մասով նույնպես կայացված են համապատասխան վճիռներ»,- գրել էր Անդրեասյանը՝ հավելելով, որ կրթությունը չպետք է լինի կեղծիքի տեղ։
Թեմայի շուրջ MediaHub.am-ը զրուցել է Մարինե Մալախյանի հետ։
Դպրոցի նախկին տնօրենը նախ նշեց, որ ծանոթ չէ Ժաննա Անդրեասյանի գրառմանը, ապա նեղսրտեց, որ իրեն՝ 44 տարվա մանկավարժին, նման կերպ են շնորհակալություն հայտնում։
«Ես 25 տարի աշխատել եմ որպես դպրոցի տնօրեն, և որևէ մի անգամ որևէ այդպիսի դեպք չի եղել։ Դա է շնորհակալությունը»,- նկատեց նա։
Ինչ վերաբերում է իրեն լիցենզիայից և մանկավարժությամբ զբաղվելու իրավունքից զրկելուն, Մարինե Մալախյանը նշեց, որ ինքը գնում է իր հանգստին, որը վաստակել է։
«Ես արդեն թոշակի անցած անձնավորություն եմ, ես աշխատել եմ շատ երկար տարիներ՝ առք ու փառքով, մեծ հարգանքով և հիմա էլ հանգստի եմ անցնում, թոռնիկներովս կզբաղվեմ»,- ասաց նա։
Մարինե Մալախյանը նեղսրտեց՝ ինչ ուզում են, թող անեն, իրեն զրկել են լիցենզիայից, բայց իր համար այդ «պատիժը» բացարձակ պատիժ չէ։
Նարե Գևորգյան