Մահացել է Հայաստանի սահմանները պահպանած ռուս գեներալ-մայոր Վիկտոր Զոլոտուխինը։

Մարտական գեներալ, սահմանապահ զորքերի լեգենդ Վիկտոր Նիկոլաեւիչ Զոլոտուխինը, որը ծառայել է Հեռավոր Հյուսիսում, Տաջիկստանում, Չեչնիայում, 2000-ականների սկզբին նշանակվել է Հայաստանում ՌԴ ԱԴԾ սահմանային վարչության պետի առաջին տեղակալ եւ ծառայել երկրում 9 տարի: Նրան անվանում էին «Արգունի դուքս» եւ ուղարկում սահմանների ամենադժվար հատվածները, նրան հետեւում էին դիպուկահարները եւ դարանակալում գրոհայինները, նա փայլուն կրթված էր եւ անսահման պարկեշտ, նրան հարգում էին զինվորները եւ գնահատում հրամանատարությունը:

Գեներալ Զոլոտուխինն իր գործի պրոֆեսիոնալ էր, մարդ, որն ունակ էր կայծակնային ու անսխալ որոշումներ կայացնել, հավասարապես վստահ էր թե՛ մարտի դաշտում, թե՛ շքեղ սրահների մանրահատակի վրա, գնահատում էր պոեզիան, բանաստեղծություններ էր գրում, պաշտում էր հեղինակային երգը։

2012-ին Երեւանում ՄՄԳԿ-ի «Մոսկվայի տան» կողմից անցկացվող «Ճանապարհ դեպի ինքդ քեզ» ստեղծագործական երեկոների ցիկլի շրջանակներում տեղի էր ունեցել նրա երեկոն, որն ինքը Զոլոտուխինն այն ժամանակ անվանել էր «ընկերների հանդիպում»: «Կյանքում եղել է մի շրջան, երբ որոշակի գրականություն ուսումնասիրելուց հետո ես հանել եմ խաչը, որը առանց հանելու տարել էի ամբողջ Տաջիկստանով, միգուցե հենց դա է ինձ փրկել... Ես այստեղ արդեն առանց խաչի եմ եկել: Ժողովրդին, հողին, հանրապետության արժեքներին, Գեղարդի, Էջմիածնի եկեղեցիներին ծանոթանալուց հետո նորից կրեցի եւ հիմա քայլում եմ խաչով ու նույնիսկ հայկական ծաղկած խաչով։ Ինը տարի։ Ես երբեք ոչ մի տեղ այսքան շատ չեմ ծառայել։ Խորը խոնարհում եմ Հայաստանի եւ նրա ժողովրդի առջեւ»,- բեմից ասել էր Զոլոտուխինը։

Պահեստային դառնալուց հետո նա շարունակում էր զբաղվել հասարակական աշխատանքով։

Չեչենական երկրորդ պատերազմի ժամանակ «Արգուն» գործողությանը մասնակցած (նա ղեկավարել է սահմանային դեսանտի գործողությունները եւ կարեւոր դեր է խաղացել գործողության հաջողության մեջ) գեներալ Վիկտոր Զոլոտուխինի մահը հարված էր նրա ծառայակիցներին։ Այսօր Վիկտոր Նիկոլաեւիչին հուղարկավորել են։ «Արգուն» հատուկ գործողությունը տեղի է ունեցել 1999 թվականի դեկտեմբերի - 2000 թվականի փետրվար ամիսներին։ Դրանք սահմանային, դեսանտային-գրոհային եւ հրետանային ստորաբաժանումների համատեղ գործողություններ էին ռուս-վրացական սահմանի չեչենական հատվածում ռուսական բանակի վերահսկողությունը վերականգնելու համար։ Գործողության արդյունքում դաշնային զորքերը վերահսկողության տակ են վերցրել Չեչնիան Վրաստանին կապող մայրուղին։ Դա բեկել է չեչենական երկրորդ պատերազմի վերջնական ընթացքը։ Վիկտոր Զոլոտուխինը իր մահից քիչ առաջ նկարահանվել է ««Արգուն» օպերացիա» ֆիլմում, որտեղ նա մարմնավորել է ինքն իրեն։