Իշխանությունները վերջին շրջանում տոտալ հարձակում են սկսել «Մայր Հայաստան» խմբակցության դեմ․ առաջին դեպքը կապված է Նարինե Հայրապետյանի հետ։ Այդ մասին այսօր իր հրավիրած հրատապ ճեպազրույցի ժամանակ ասաց «Մայր Հայաստան» շարժման ղեկավար Անդրանիկ Թևանյանը՝ հիշեցնելով, որ Հայրապետյանին ահաբեկել են ու հորդորել դադարեցնել իր գործունեությունը։
Դրանից հետո էլ, ըստ Թևանյանի, Նարինե Հայրապետյանին ստիպել են կեղծ ցուցմունք տալ, ու դրա պատճառով Հայրապետյանը ստիպված է եղել լքել Հայաստանը։
«Քար լռություն է իրավապահ համակարգի կողմից։ Դրան հաջորդեց մեր խմբակցության անդամ Արշակ Սարգսյանի դեմ հարձակումը․ նրան մի քանի օր հետապնդել են՝ առանց համարանիշի մեքենայով։ Զարմանալի է, որ մեքենան մի քանի օր առանց համարանիշի շրջել է քաղաքում։ Արշակ Սարգսյանը դիմել է ոստիկանություն, և դրանից հետո հայտնաբերել են մեքենան․ մեքենայում գտնվող մարդիկ էլ բերման են ենթարկվել։ Եվ վերջինը․ մենք երեկ ստացանք լուր, որ ՔՊԿ-ն իր քույր կուսակցության հետ միասին ավագանու արտահերթ նիստ է նախաձեռնել և մեր ավագանու չորս անդամի նկատմամբ, ինչպես նաև Հայկ Մարությանի նկատմամբ, գործընթաց է սկսվել, որ վերջիններս մանդատները վայր դնեն»,- նշեց Թևանյանը։
Նա նկատեց, որ սա քաղաքական հետապնդում է իրենց նկատմամբ։
«Այս բոլոր գործողությունները մեկ նպատակ ունեն․ իշխանությունն ուզում է, որ իր գործունեության դեմ պայքարող չլինի։ Սրանք փորձում են հիմա էլ տրանսպորտը թանկացնել»,- նկատեց նա։
Անդրանիկ Թևանյանը տեղեկացրեց, որ քվորում ապահովելու համար հիմա էլ երրորդ ուժին են փորձում «բերման ենթարկել»։
«Սա բացարձակ ապօրինություն է, և մենք ահազանգում ենք՝ ասելով, որ մեր մանդատն իրացնելու ենք»,- շեշտեց Թևանյանը։
Մանրամասները՝ տեսանյութում