Ճակատ ճակատի բախվել են «Infiniti»-ն ու «Volkswagen Jetta»-ն․ կա 3 վիրավոր

Այսօր՝ հուլիսի 17-ին, ավտովթար է տեղի ունեցել Սյունիքի մարզում։ Ժամը 19։15-ի սահմաններում Խնածախ գյուղի խաչմերուկում ճակատ ճակատի բախվել են «Infiniti» և «Volkswagen Jetta» մակնիշի ավտոմեքենաները։

Ինչպես հայտնում է ֆոտոլրագրող Գագիկ Շամշյանը, վթարի հետևանքով 3 հոգի մարմնական վնասվածքներով տեղափոխվել է «Գորիս» բժշկական կենտրոն։

Դեպքի վայր է ժամանել ՀՀ Ներքին գործերի նախարարության փրկարար ծառայության Սյունիքի մարզի թիվ 55 հրշեջ փրկարարական ջոկատից 1 մարտական հաշվարկ։

Վթարի մասին Ոստիկանության Գորիսի բաժնից տեղեկությունը փոխանցել են ՀՀ Քննչական կոմիտեի Սյունիքի մարզային քննչական վարչության Գորիսի քննչական բաժին, որտեղից ժամանել է քննչական խումբը՝ օրվա պատասխանատու հերթապահ քննիչի գլխավորությամբ։

Վթարի փաստով Քննչական բաժնում նախաձեռնվել է քրեական վարույթ, որտեղ պարզվում են վարորդների և վիրավորների ինքնությունը։