Երևանի ավագանու ընտրություններին դեռ մի քանի ամիս կա, բայց քաղաքապետի պաշտոնի համար նախընտրական պայքարը, ինչպես հայտնի է, վաղուց է մեկնարկել:
Եթե մինչ այսօր այդ գործընթացում ամենից ակտիվ ներգրավված էր Երևանի փոխքաղաքապետ Տիգրան Ավինյանը, ապա կամաց-կամաց ակտիվանում են նաև հավանական մյուս թեկնածուները՝ փորձելով իրենց PR կամպանիայում առավել կրեատիվ երևալ:
Օրինակ, «Լուսավոր Հայաստան» կուսակցության քաղաքապետի թեկնածուն՝ Դավիթ Խաժակյանը, այսօր երևանցիների աչքին ավելի լավը երևալու համար «կոմունալշիկների» հետ է օրն անցկացրել... դե, կամ էլ այնքան ժամանակ, որ անհրաժեշտ լուսանկարները ստանա:
«Աշխատանքի օրվա առթիվ միացել եմ Երևան քաղաքի կոմունալ ծառայությունների աշխատանքներին:
Չնայած այս օրը տոնական է և աշխատանքային չէ, կոմունալ ծառայությունները կատարում են իրենց աշխատանքը՝ ապահովելով բնակիչների հարմարավետությունը քաղաքում:
Շնորհավոր Մայիսի 1»,- գրել է նա ֆեյսբուքյան իր էջում:
Տեսնենք, թե մյուս թեկնածուները ինչպիսի լուսանկարներով ու իբրև թե կարևոր գործունեությամբ են փորձելու շահել երևանցիների սիրտն ու ստանալ նրանց քվեն: