Եթովպիայի իշխանությունները չեն բացառել, որ տեխնիկական աջակցություն կխնդրեն Ռուսաստանից Երկնագույն Նեղոսի ջրի մակարդակն ուսումնասիրելու համար՝ ամբարտակի հետ կապված բողոքների պատճառով։ Այս մասին «ՌԻԱ Նովոստի»-ին ասել է ՌԴ-ում Եթովպիայի դեսպան Ալեմայեհու Թեգենուն։ Խոսքը արբանյակային լուսանկարներ տրամադրելու մասին է, իսկ բողոքներ ներկայացնում են Սուդանը եւ Եգիպտոսը։

Աֆրիկյան Եթովպիան 2012-ից իրականացնում է «Վերածնունդ» ամբարտակի շինարարությունը։ Դրա գործարկումը, փորձագետների կարծիքով, կհանգեցնի ջրի անբավարարության Սուդանում եւ Եգիպտոսում, որոնք գտնվում են գետի հոսանքի ներքեւի հատվածում, տեղեկացրել է «Коммерсантъ»-ը։ 

Թեգենուի խոսքով՝ վերջերս ավարտվել է ամբարտակը ջրով լցնելու երրորդ փուլը, սկսել է էլեկտրաէներգիա արտադրել երկրորդ տուրբինը։ «Եվ որ ամենահետաքրքիրն է՝ դա որեւէ կերպ չի ազդել գետի հոսանքի ներքեւի մասում գտնվող երկրների վրա։ Ընդհակառակը, Սուդանում հեղեղում է սկսվել։ Դա ցույց է տալիս, որ ամբարտակը ոչ մի ազդեցություն չունի Սուդանի եւ Եգիպտոսի վրա»,- ասել է դեսպանը։

Ռուսական կողմն ավելի վաղ առաջարկել էր արբանյակային լուսանկարներ տրամադրել գետի հոսքի մասին տարվա տարբեր եղանակներին, որպեսզի հարթի Խարթումի եւ Կահիրեի հնարավոր դժգոհությունները, տեղեկացրել է «ՌԻԱ Նովոստի»-ն։ Ալեմայեհո Թեգենուն հայտարարել է, որ Եթովպիան հարցը կդիտարկի հետագայում։ «Եթովպիան գնահատում է այս առաջարկը, եւ անհրաժեշտության դեպքում մենք անպայման կդիմենք Ռուսաստանին»,- տեղեկացրել է Թեգենուն։ Մինչ այդ դեսպանն ասել էր, թե ամբարտակն ամբողջովին ջրով կլցվի մինչեւ 2023թ. վերջ։