Անգոլացիները եւ օտարերկրյա բարձրաստիճան պաշտոնյաները կիրակի օրը հավաքվել են երկրի երկարամյա նախկին ղեկավար Խոսե Էդուարդո դոս Սանտոսի հուղարկավորությանը, ով մահացել էր Իսպանիայում հուլիսին, սակայն ում հուղարկավորությունը հետաձգվել էր՝ ընտանիքի կողմից դիահերձում իրականացնելու խնդրանքով պայմանավորված, հայտնում է Reuters լրատվական գործակալությունը:
Դոս Սանթոսը մահացել է Բարսելոնայի կլինիկաներից մեկում հուլիսի 8-ին՝ 79 տարեկանում։
Նախկին նախագահն ու ընտանիքը գերիշխող դեր ունեին Անգոլայի քաղաքականության մեջ իր կառավարման 38 տարիների ընթացքում՝ մինչեւ 2017 թվականը: Նրա նախկին մարքսիստական կուսակցությունը՝ Անգոլայի ազատագրման ժողովրդական շարժումը, որը իշխանության ղեկին է մոտ հինգ տասնամյակ, գրեթե հաղթել է չորեքշաբթի կայացած ընտրություններում:
«Հանգուցյալ նախկին նախագահ Խոսե Էդուարդո դոս Սանտոսի պետական հուղարկավորության կապակցությամբ Ազգային ոստիկանությունը կոչ է անում բոլոր քաղաքացիներին, քաղաքացիական հասարակությանը եւ կազմակերպված խմբերին, ովքեր մտադիր են շաբաթ եւ կիրակի օրերին միջոցառումներ կազմակերպել, զսպել իրենց՝ ի հարգանք նախկին ղեկավարի»,- ասված է Անգոլայի ազգային ոստիկանության տարածած հայտարարության մեջ, որը շաբաթ օրը հեռարձակել է Lusa լրատվական գործակալությունը։
Ձայների 97 տոկոսը հաշվելուց հետո Անգոլայի ազատագրման ժողովրդական շարժումը եւ նախագահ Ժոաո Լոուրենսոն ստացել են համաժողովրդական ձայների 51 տոկոսը, իսկ գլխավոր ընդդիմադիր Անգոլայի ամբողջական անկախության ազգային միությունը կամ UNITA-ն՝ 44,5-ը:
UNITA-ի ղեկավար Կոստա Ջունիորը հերքել է ընտրությունների արդյունքները՝ դրանք կեղծիք որակելով, եւ երկրում տեղի են ունեցել բողոքի ակցիաներ, որոնք արագորեն ճնշվել են ոստիկանության կողմից: Ընտրական հանձնաժողովը հայտարարել է, որ գործընթացը եղել է արդար եւ թափանցիկ:
Ե՛վ Լոուրենսոն, եւ՛ Ջունիորը պետք է մասնակցեին Դոս Սանտոսի հուղարկավորությանը:
Նախկին ղեկավարի մարմինը վերադարձվել է երկիր շաբաթավերջին այն բանից հետո, երբ հետաձգվել էր նրա դստեր՝ Չիզեի պահանջած ամբողջական դիահերձումը: Իսպանացի դատավորը որոշել է, որ մահը վրա է հասել բնական պատճառներով։
Հազարավոր անգոլացիներ շաբաթ օրը դուրս են եկել փողոց՝ հարգանքի տուրք մատուցելու Դոս Սանտոսին: