Սեպտեմբերի 18-ին կայանալիք վարչության ընտրությանը և կուսակցության համագումարին ընդառաջ՝ «Քաղաքացիական պայմանագիր» կուսակցության ներսում ակտիվ քարոզարշավ է ընթանում։ Այդ մասին MediaHub.am-ի հետ զրույցում ասաց ՔՊ-ական պատգամավոր Հովիկ Աղազարյանը։

Նրա խոսքով՝ թե՛ ՔՊ կանոնադրության մեջ, թե՛ ծրագրում փոփոխություններ են լինելու, դրանից հետո ընտրվելու է նոր վարչություն։
«Հիմա մենք քարոզչական շրջանում ենք, բոլոր թեկնածուները խառը, ոչ ստանդարտ ձևաչափով մասնակցում են պատվիրակների հետ հանդիպումներին, ներկայացնում են իրենց մոտեցումներն ու պատկերացումները»,- ասաց Հովիկ Աղազարյանը։

Անդրադառնալով մամուլում շրջանառվող լուրերին, թե նոր վարչության ընտրությունը կրքեր է բորբոքել ՔՊ-ում և թիմը բաժանել մի քանի մասերի, նա ասաց, որ որևէ լարվածություն չկա, և համաժողովը ցույց է տալու՝ ՔՊ-ն շարունակում է քաղաքական նոր մշակույթի սերմանումը Հայաստանում, թե ինչպես պետք է քաղաքական ուժերն իրենց ներսում ժողովրդավար ձևով պայքարեն իրար դեմ։

Դիտարկմանը, որ, ըստ մեր տեղեկությունների, ՔՊ վարչության նախագահի պաշտոնի համար թեժ պայքարի մեջ են, մասնավորապես, Արսեն Թորոսյանն ու Տիգրան Ավինյանը, Հովիկ Աղազարյանն արձագանքեց՝ վարչության կազմը մինչև չհաստատվի, որևէ անուն չի կարող շրջանառվել։
«Վարչության 15 անդամները, նախ, պետք է ընտրվեն, ապա նոր նախագահ պետք է ընտրվի։ Դա լինելու է համաժողովից հետո, վարչության անդամ ընտրված 15 հոգուց մեկը կդառնա։ Հետևաբար, նախ պետք է դառնալ վարչության անդամ, նոր հավակնել այդ պոստին (պաշտոն - խմբ․)։ Այսինքն, եթե որևէ մեկն այսօր պայքարում է ՔՊ վարչության նախագահի պաշտոնի համար, անիմաստ քայլ է անում»,- նշեց Աղազարյանը։

Հարցին, թե, իր կարծիքով, ո՞վ է ավելի արժանի ՔՊ վարչության նախագահի պաշտոնին, Աղազարյանն ընդամենն արձագանքեց՝ ճիշտ չի լինի այսքան շուտ նման հայտարարություն անելը։
Ինչ վերաբերում է լուրերին, թե Տիգրան Ավինյանի թեկնածությանը շատերը դեմ են, քանի որ նա ժամանակից առաջ ընկնելով հայտարարեց, թե Երևանի քաղաքապետի ՔՊ թեկնածուն է, թեև թիմի ներսում տրամադրություններ են փոխվել ու կասկածներ կան, Աղազարյանը միայն ասաց՝ ՔՊ վարչությունը շատ վաղուց է այդ որոշումն ընդունել։

Նշենք, որ ըստ մամուլի՝ սեպտեմբեր ամսվա ընթացքում Երևանի ավագանին կքննարկի Տիգրան Ավինյանին Երևանի փոխքաղաքապետ նշանակելու հարցը։

Նարե Գնունի