Երեկ ուշ  երեկոյան տեղի է ունեցել «Քաղաքացիական պայմանագիր» կուսակցության վարչության նիստ, որը վարել է Նիկոլ Փաշինյանը: 

Վարչության նախագահի առաջարկությամբ Վահագն Ալեքսանյանը նշանակվել է վարչության նախագահի տեղակալ՝ զարգացման և կապերի գծով, իսկ Գևորգ Պապոյանը՝ վարչության նախագահի տեղակալ՝ տարածքային կազմակերպությունների համակարգման գծով։

Անշուշտ, շատ ուշագրավ նիստ է, որը նորովի բացահայտում է Փաշինյանի կադրային քաղաքականության նոր բաղադրիչները:

Նախ, ՔՊ-ն իր վերջին համագումարում ընտրեց վարչություն՝ ընտրախախտումներով ու կասկածելի լեգիտիմությամբ, ու մեկ սկզբունքով՝ ընտրության չափանիշն անձնական հավատարմությունն էր Փաշինյանին, նրա խոսնակը լինելու նվաստացուցիչ կարգավիճակը: Այլ խոսքով, ՔՊ-ն ընտրեց գորշ վարչություն:

Սակայն երեկ Փաշինյանն ավելի առաջ է գնացել՝ կուսակցությունում «ասող» նշանակելով երկու գործիչների, որոնք չունեն սեփական «Ես» և Վահագն Ալեքսանյանի ինքնատիպ խոստովանությամբ՝ ավելի արժեքավոր չեն, քան՝ Փաշինյանի «ուսապարկը»:

Սա ուղղակի մարտահրավեր է ՔՊ-ում եղանակ ստեղծող «ծանրքաշայիններին», որոնք փաստորեն «հավասար հեռավորության» մեջ դրվեցին Փաշինյանից:

Ի դեպ, Փաշինյանի նորաթուխ երկու տեղակալները մեկ այլ առանձնահատկություն ու ընդհանրություներ ունեն:
Նրանք երկուսն էլ, որպես գործիչ, ՔՊ-ում չեն աճել:

Վահագն Ալեքսանյանն իր առաջին քայլերն արել է ԲՀԿ-ում, որտեղ, ի դեպ, հասցրել է մի քանի անգամ հրապարակավ «նախշել» ՔՊ գործիչներին:

Գևորգ Պապոյանն այսօր, թերևս, հեռանկարային հանրապետական գործիչ ու հավատավոր նժդեհական կլիներ, եթե հեղափոխության ալիքը նրան ՀՀԿ ափից չտաներ ՔՊ ապահով գիրկը:

Նիկոլ Փաշինյանին այլևս պետք են իրեն քծնող, անդեմ ու անսկզբունք մարդիկ, ովքեր, ըստ անհրաժեշտության, կարող են «քար նետել» անգամ գործող վարչապետի ներկուսակցական «մրցակիցների» ուղղությամբ:

Վահրամ Բագրատյան