Ինչու Արցախի նախկին պետնախարար, գործող պետնախարարի խորհրդական Արտակ Բեգլարյանը նստացույց ու բողոքի ակցիա չի իրականացնում Կառավարության շենքի մոտ, այլ ընտրել է ՄԱԿ-ի երևանյան գրասենյակը:
Այս հարցն ընդամենը մի քանի ժամ առաջ բարձրաձայնել էր նաև MediaHub-ը և որին քիչ առաջ ուղիղ եթերով պատասխանեց Բեգլարյանը:
«Այո, Հայաստանի Հանրապետությունը գլխավոր պատասխանատուներից է: ՀՀ, Արցախի կառավարությունները և ՌԴ-ը հիմնական պատասխանատուներն են այս իրավիճակի, հետո նոր մնացած երկրները: Սակայն ՀՀ Կառավարության շենքի առջև ակցիաները կարող էին միակողմանի լինել՝ միայն ՀՀ Կառավարության պատասխանատվության հարց չէ սա: Եվ երկրորդ, ես ունեմ պաշտոնական էթիկայի և օրենսդրության հարցեր, որոնք ինձ կաշկանդում են ՀՀ ներքաղաքական հարցերի մեջ մտնել, ներգրավվել»,- հայտարարեց Արտակ Բեգլարյանը:
Ի դեպ, ևս մի քննադատության նա անդրադարձավ՝ ինչու հենց ՄԱԿ-ի գրասենյակի մոտ է ակցիան իրականացվում.
“Եթե միայն ՌԴ դեսպանատան առջև ակցիա անեինք, ապա կստացվեր, որ միայն Ռուսաստանին են համարում պատասխանատու: Այդ իսկ պատճառով ընտրել են ՄԱԿ գրասենյակը, որպես կոլեկտիվ կառույց”,- հայտարարեց նա:
Ավելի վաղ MediaHub-ը գրել էր, որ Արտակ Բեգլարյանը, որը, կարծես թե, մոռացել է, որ Լեռնային Ղարաբաղի ինքնորոշման հարցը անքակտելիորեն կապված է արցախահայության գոյության հետ, գեներացնում է Փաշինյանի գլխավորությամբ ՔՊ-ականների առաջ բերած՝ «ստեղծված իրավիճակում բոլորը մեղավոր են, բացի մեզնից» թեզը, այդպիսով իրենց «անողնաշար ու անատամ» դիվանագիտության հետեւանքները բարդելով՝ նախկինների, ռուս խաղաղապահների, միջազգային հանրության ու ժողովորդի վրա։ Հիմա այն փուլն է, երբ պետք է իրականություն դառնա ՔՊ-ականների՝ Արցախի հարցը միջազգային հանրության դաշտ նետելու եւ այս տարածաշրջանում Ռուսաստանի դիրքերը թուլացնելու երազանքը։ Արտակ Բեգլարյանի, առաջին հայացքից, «անմեղ» նստացույցը ծառայում է ի նպաստ այս քաղաքականության։