Սաքսոնիայի դաշնային երկրամասի վարչապետ Միխայել Կրետշմերը հայտարարել է, որ ուկրաինական հակամարտության ավարտից հետո ռուսական գազը կրկին պետք է դառնա Գերմանիայի էներգետիկ հաշվեկշռի մասը։
Կրետշմերը Bild am Sonntag-ին տված հարցազրույցում կոչ է արել, ուկրաինական պատերազմի ավարտից հետո, կրկին կանաչ լույս վառել դադարեցված «Հյուսիսային հոսք 2» գազատարի վրա։
«Մեզ անհրաժեշտ են երկարաժամկետ պայմանագրեր ԱՄՆ-ից, Քաթարից եւ արաբական այլ պետություններից բնական հեղուկ գազ մատակարարելու համար», - ասել է նա՝ նկատի ունենալով հեղուկացված բնական գազը, որն օգնում է փոխարինել ռուսական մատակարարումներին:
«Բացի այդ, մենք պետք է վերջապես զարգացնենք մեր բնական գազը Հյուսիսային ծովում: Իսկ երբ պատերազմն ավարտվի, մենք պետք է նորից օգտագործենք Ռուսաստանի գազը»,- հավելել է վարչապետը։
Կրետշմերը կրկին կոչ է արել դադարեցնել պատերազմն Ուկրաինայում՝ ԵՄ-ի, ԱՄՆ-ի, Չինաստանի, Հնդկաստանի եւ Ճապոնիայի համատեղ դիվանագիտական ջանքերով։
«Չկա որեւէ պատճառ նրա համար, թե ինչու Ուկրաինան պետք է զիջի իր տարածքի թեկուզ մեկ քառակուսի մետրը», - ասել է նա՝ հավելելով, որ պատերազմի վնասը պետք է փոխհատուցի Ռուսաստանը, իսկ ռազմական հանցագործները պետք է պատասխանատվության ենթարկվեն։
«Այդ մտածելակերպով պետք է գնալ խաղաղ բանակցությունների։ Մենք այլեւս ստիպված չենք այս հարցերով զբաղվել մարտի դաշտում։ Եվրոպան պետք է ավելի մեծ ճնշում գործադրի խաղաղ բանակցություններ սկսելու համար», - նշել է նա՝ թերահավատորեն մոտենալով Ռուսաստանի նկատմամբ ԵՄ պատժամիջոցների ազդեցությանը՝ ենթադրելով, որ դրանք վնաս են հասցնում Գերմանիայի տնտեսությանը։