Կենտրոնում մեկ օրից ավելի գազ չկա

Կենտրոնի մի շարք հասցեներում մեկ օրից ավելի գազ չկա։ Երեկ, ինչպես նախապես տեղեկացրել էին, ժամը 9:00-ից գազն անջատել են, և երեկոյան ժամը 20:00-ին գազամատակարարումը պետք է վերականգնվեր, սակայն երեկոյան կենտրոնի բնակիչների տներում գազն այդպես էլ չմիացրեցին: 

Կենտրոնի բնակիչների բողոքներից հետո գազամատակարարող ընկերությունից նշեցին, որ գազը պետք է միացնեն առավոտյան ժամը 11:00-ին, սակայն այս պահին էլ դեռ Կենտրոն վարչական շրջանի մի շարք փողոցներ գազ չունեն:

Կենտրոնի բնակիչները բողոքում են, թե վերջին շրջանում գազի անջատումները նույնքան հաճախակի են, ինչ «ՀԷՑ»-ի և «Վեոլիա Ջուր» ընկերությունների կողմից էլեկտրաէներգիայի և ջրանջատումները, որոնք ամռան շոգին մարդկանց թողնում էին առանց լույս ու ջուր։ 

Ընկերությունից հայտնում են՝ ձմռան նախապատրաստական պլանային աշխատանքներ իրականացնելու նպատակով` հոկտեմբերի 11-ին ժամը 09։00-ից մինչև ժամը 20։00-ն, պետք է դադարեցվեն Երևան քաղաքի Կենտրոն վարչական շրջանի Մյասնիկյան, Աբովյան, Նալբանդյան, Խանջյան, Տ.Մեծի, Նար-Դոսի, Այգեստան, Չարենցի, Ալ.Մանուկյան, Սայաթ-Նովայի փողոցներով պարփակված թաղամասի գազասպառողների, հարակից տարբեր նշանակության հանրային կազմակերպությունների գազամատակարարումը: Սակայն, ինչպես արդեն նշեցինք, ընկերությունը ժամկետները խախտել է:

Մարիաննա Արամյան