«Իրավունք» թերթը գրում է.

«Օգոստոսի 1-ից երևանցիներն այլևս չեն կարողանա տրանսպորտի համար վճարել թղթային QR տոմսերով: Քաղաքապետարանը դարձյալ խոշոր փոփոխություն է անում տրանսպորտի վճարման համակարգում՝ վերացնում է մեկանգամյա տոմսերի թղթային տարբերակները: Դրա փոխարեն քաղաքացիները պիտի տրանսպորտային քարտ գնեն ու լիցքավորեն, վճարեն բջջային հավելվածով, կամ էլ բանկային քարտով:

Քաղաքային իշխանությունները հայտարարում են՝ չէին նախատեսում, որ քաղաքացիները հենց այդ 150 դրամանոց թղթե տոմսերից ավելի շատ կօգտվեն, դրանք ավելի հարմար տարբերակ կհամարեն: Հիմա թղթե տոմսերը շրջանառությունից հանելով՝ ավագանու իշխող խմբակցության ղեկավար Արմեն Գալջյանն ասում է՝ երևանցիներին կմղեն հասկանալու, որ վճարման այլ տարբերակներն ավելի հարմար են:

Քաղաքային իշխանություններն այս նոր որոշման պատճառների թվում նշում են էկոլոգիական ու տեխնիկական խնդիրները. - «Դրանք աղբ են դառնում, էկոլոգիական առումով խնդրահարույց է, հետո հաճախ հերթեր են գոյանում տերմինալ սարքերի մոտ, երբեմն խնդիր է առաջանում դրանք տպվելու, որոշակի խնդիրներ են լինում, ու սարքերը դժվարությամբ են կարդում, որը նաև հերթ է առաջացնում արդեն ավտոբուսների մեջ»:

Համակարգը ներդնելուց առաջ հենց այս քննադատությունն էին հնչեցնում նաև ընդդիմադիրները, նշելով, որ տրանսպորտային ռեֆորմը լավ մտածված չէ և պետք է այլ լուծումներ որոնել:

«Ազգային առաջընթաց» խմբակցության քարտուղար Իզաբելլա Աբգարյանը ժամանակին հենց թղթային QR կոդերի ստեղծած բնապահպանական խնդիրների մասին էր խոսում, հիմա ասում է՝ կասկածում է, որ քաղաքային իշխանություններին հանկարծ սկսեց հետաքրքրել էկոլոգիան:

Իզաբելլա Աբգարյանն ասում է՝ ի սկզբանե տրանսպորտային ռեֆորմը վատ է պլանավորվել, ու հիմա երևում են դրա արդյունքները:

«Մայր Հայաստան» խմբացկության ղեկավար Մանուկ Սուքիասյանն էլ կարծում է՝ քաղաքային իշխանությունները դարձյալ առանց հաշվարկի փոփոխություններ են անում, միասնական փաթեթների արդյունավետությունը կարելի կլիներ ստուգել, եթե 100 դրամանոց տոմսը պահպանվեր ու փորձնական ժամանակահատված տրվեր հաշվարկների ու իրական տրանսպորտային բարեփոխում պլանավորելու համար:

Արդյոք օգոստոսին դարձյալ ականատես կլինե՞նք այնպիսի քաոսային իրավիճակի, ինչպես 100 դրամանոց մետաղադրամները վերացնելու ժամանակ, Արմեն Գալջյանը կարծում է, որ ամեն ինչ հարթ կանցնի:

«Հրապարակ» թերթը գրում է.

ԱԺ-ում երեկ տեղի ունեցած ծեծկռտուքի ժամանակ ընդդիմադիր պատգամավորներին ՔՊ-ական տղամարդկանց ագրեսիվ պահվածքից առավել զարմացրել է ՔՊ-ական կանանց վարքը։ Մեզ պատմեցին, որ նրանք տղամարդուն հատուկ հայհոյանքներ ու անեծքներ են տեղացել, այնպես, որ ոմանք կարկամել եւ, կռիվը թողած, փորձել են պարզել, թե յոթհարկանի հայհոյանքն ում բերանից դուրս եկավ։ Մենք նկատել էինք նաեւ, որ մինչեւ կռիվը՝ Արթուր Սարգսյանի եզրափակիչ ելույթի ժամանակ, Հասմիկ Հակոբյանն ու Լիլիթ Ստեփանյանը ծիծաղում եւ տեղից ռեպլիկներ էին անում

Ոմանց մոտ տպավորություն է ստեղծվել, որ ՔՊ-ականները նախապես են սադրանքը պլանավորել, որ հունից հանեն կալանքի գնացող Արթուր Սարգսյանին: Եվ վերջին պահին էլ, երբ նա դուրս էր գալիս դահլիճից, նրան «թռնող» անվանեցին, բայց նա նետեց, որ միշտ պայքարել է տղամարդավարի, ինչից հետո Վահե Ղալումյանը թիկունքից հարձակվեց

Իսկ ծեծկռտուքի ժամանակ ՔՊ-ականները նաեւ «ինքնագոլեր» են խփել` իրար են ճանկռել, Արթուր Հովհաննիսյանի նետած ջրի շիշը դիպել է ՔՊ-ական Կարեն Համբարձումյանի ճակատին։ Ուշագրավ է, որ այս ծեծկռտուքին դահլիճում անձամբ հետեւում էր գլխավոր դատախազ Աննա Վարդապետյանը, որն այդպես էլ մինչեւ ուշ երեկո իրավական գնահատականի չարժանացրեց որեւէ մեկի արարքը, այն պարագայում, երբ տեսանյութերից երեւում են բռնություն գործադրողները. Ռուստամ Բաքոյան, Նարեկ Գրիգորյան, Դավիթ Կարապետյան, Արթուր Հովհաննիսյան, Արսեն Թորոսյան, Տիգրան Պարսիլյան, Վահե Ղալումյան, Արեն Մկրտչյան եւ այլք։

«Իրավունք» թերթը գրում է.

«ՔՊ-ում վստահ են, որ կաթողիկոսը մինչեւ սեպտեմբեր կգնա, այդ մասին նրանց տեղեկացրել է Փաշինյանը։ Ավելին, ըստ նույն աղբյուրի, Փաշինյանը թիմակիցներին վստահեցրել է, որ Մայր Աթոռում էլ կան կաթողիկոսին դեմ հոգեւորականներ, որոնք ասել են, որ պատեհ առիթի կկանգնեն իրենց կողքին։

Թե ովքեր են այդ հոգեւորականները, ըստ աղբյուրի, նրանք են, ովքեր լուռ հետեւում են զարգացումներին եւ իրենց պահում են ռուսի ասած՝ «не мясо, не рыбо» ոճի մեջ։

«Ժողովուրդ» օրաթերթը գրում է.

««Ժողովուրդ» օրաթերթի տեղեկությունների համաձայն՝ իշխանության ներկայացուցիչներից շատերի համար անհասկանալի է, թե ինչ պլաններ ունի վարչապետ Նիկոլ Փաշինյանը Վեհափառին վեհարանից հեռացնելու վերաբերյալ: Շատ ՔՊ-ականներ մեզ հետ զրույցում պատմեցին, որ Փաշինյանը քիչ մարդկանց է տեղեկացնում իր առաջիկա անելիքների մասին, ու, կարելի է ասել, ՔՊ-ականներից շատերը տեղեկությունն իմանում են նրա ֆեյսբուքյան գրառումներից, մամուլից:

Երեկ բոլորի համար անհասկանալի էր, թե ինչ է նկատի ունեցել Փաշինյանը՝ հայտարարելով. «Ես առաջնորդելու եմ այդ ազատազրկումը»:

Այսինքն՝ Փաշինյանը որոշել է վեհարան գնալ, այնտեղ գործողություններ սկսել, բայց իր թիմը տեղյակ չէ դրա մասին, առավել եւս նրանց համար անհասկանալի է, թե Փաշինյանն ինչպես է դա անելու:

Չնայած նրան, որ ՔՊ-ականները երեկ ավարտեցին ԱԺ արտահերթ նստաշրջանը, բայց բոլորն էլ հասկանում էին, որ արձակուրդն իրենց համար չի կարող սկսվել, քանի որ Նիկոլ Փաշինյանն առաջիկայում կոնկրետ պլաններ ունի իրագործելու: Նա պետք է հասնի Վեհափառի հրաժարականին, հասցնի կալանավորել էլի մարդկանց` ինչպես ԱԺ պատգամավորների, այնպես էլ Սամվել Կարապետյանի ընտանիքի ու մերձավորների շրջանից, ովքեր կրկնել են բարերարի միտքը թե՝ «Մեր ձեւով մասնակցելու ենք»: Նիկոլ Փաշինյանը «իր ձեւով» սկսել է ռեպրեսիաները»։