1956 թվականի այս օրը՝ հունիսի 13-ին, Գյումրիում ծնվել է աշխարհահռչակ մարզիկ՝ Յուրի Վարդանյանը:

Նա մարզաձևով սկսեց զբաղվել 1970 թ.-ից՝ հորեղբոր՝ Սերգեյ Վարդանյանի գլխավորությամբ Լենինականի կիսամութ դահլիճում, որտեղ հազիվ տեղավորվում էր ծանրամարտի մեկ հարթակ:

Նա աշխարհի բազմակի, օլիմպիական, Եվրոպայի և ԽՍՀՄ չեմպիոն ու գավաթակիր է:

Օլիմպիական խաղերում 82.5 կգ քաշային կարգում ոսկե մեդալ նվաճելով, համաշխարհային 5 ռեկորդ սահմանելով՝ դարձավ միջին քաշային կարգում առաջին ծանրորդը, ով երկամարտում գրանցել է 400 կգ:

Հայկական ծանրամարտի ամենավառ ներկայացուցիչն Օլիմպիական ոսկուն հասել է 1980-ին Մոսկվայում: Այդ երեկո Վարդանյանը փայլել է ու 5 ռեկորդ գրանցել: Նա եղել է Օլիմպիական խաղերի ամենաքննարկված մարզիկը:

«Չէի կասկածում, որ Օլիմպիական չեմպիոն եմ դառնալու: Ամբողջ դահլիճն էր կանգնած ծափահարում, երկար ժամանակ դրանք չէին դադարում: Իսկ դահլիճից հեռանալու համար 3 ժամ պահանջվեց, այնքան շատ երկրպագուներ էին շրջափակել ինձ»:

Մեծ ոգևորությամբ պատրաստվում էի նաև 1984-ի խաղերին: Սակայն ցավալիորեն ԽՍՀՄ-ը բոյկոտեց դրանք ու չմասնակցեց: Կազմակերպվեցին Բարեկամություն-84 խաղերը, ես կրկին 5 ռեկորդ սահմանեցի ու երկամարտում գրանցեցի 405 կգ: Չնայած Բուլղարիայում ես հաղթեցի նրանց սիրելի Զլատևին, դահլիճը Մոսկվայից ոչ պակաս ջերմ ողջունեց ինձ:

Դա էլ վերջը չէր, ցանկանում էի մասնակցել նաև 1988-ի Սեուլի Օլիմպիադային: Եթե բախտս բերեր, միանգամից 4 խաղերում կարող էի հանդես գալ: 1976-ին շատ երիտասարդ էի, ու ինձ թիմում չընդգրկեցին: Իսկ 88-ին 32 տարեկանում էլ պատրաստ էի լավ արդյունք գրանցել, բայց նորից չմասնակցեցի»,- ասել է Վարդանյանը։

1985 թվականին Վարդանյանը սահմանել է աշխարհի 43 ռեկորդ:

Նշենք, որ Վարդանյանը 80-ականների վերջում ընտրվել է ՀԽՍՀ Գերագույն խորհրդի անդամ: 90-ականների սկզբին տեղափոխվել է ԱՄՆ, զբաղվել հասարակական գործունեությամբ ու մարզչությամբ. մարզել է որդուն՝ Նորայր Վարդանյանին:

Նա 2009-ին վերադարձել է Հայաստան, նշանակվել Սերժ Սարգսյանի խորհրդական: 2013-ին ազատվել է այդ պաշտոնից և նշանակվել ՀՀ սպորտի և երիտասարդության հարցերի նախարար: 2014 թվականին ազատվել է այդ պաշտոնից ու նշանակվել Վրաստանում ՀՀ արտակարգ և լիազոր դեսպան: Իսկ այդ պաշտոնից նա ազատվել է 2017 թ-ին։

2018-ի նոյեմբերի 1-ին ԱՄՆ-ում մահացավ աշխարհահռչակ մարզիկ Յուրի Վարդանյանը։