MediaHub.am-ը Կոռուպցիայի կանխարգելման հանձնաժողովի կայքն ուսումնասիրելուց հետո պարզել է, որ մայիսի 30-ին ՀՀ վարչապետ Նիկոլ Փաշինյանը ներկայացրել է 2021 թվականի տարեկան հայտարարագիրը։

Ըստ ներկայացված տվյալների՝ Փաշինյանի կինը՝ Աննա Հակոբյանը, «Մեր տպարանը» ՍՊԸ տնօրենն է, ավագ դուստր՝ Մարիամ Փաշինյանը, Մարքեթինգային հաբի ղեկավար է «Դիջիթեյն» ՍՊԸ–ում։ Նշված է, որ որդին՝ Աշոտ Փաշինյանը չի աշխատում, նույն արձանագրումն է նաև վարչապետի անչափահաս դուստրերի՝ Շուշան և Արփի Փաշինյանների վերաբերյալ։

Փաշինյանի բնակության վայրը նշված է՝ «Կոնդի առանձնատների տնտեսություն» ՊՈԱԿ։ Փաշինյանը, որպես բանկային ավանդ, 2021 թվականի սկզբին նշել է 2 մլն 550 հազար դրամ, իսկ տարվա ավարտին՝ 3 միլիոն 15 հազար դրամ։

Ըստ հայտարարագրի՝ Փաշինյանը չորս միլիոն դրամից կամ դրան համարժեք արտարժույթից ավելի արժեք ունեցող նվեր չի ստացել, բանկային հաշիվներին հայտարարագրել է 1 միլոն դրամ տարվա սկզբին, ինչպես նաև 3,84 դոլար և 27 հազար դրամ։ Տարվա սկզբին հայտարարագրված 1 միլիոն դրամը զրոյացվել է տարվա ավարտին։Կանխիկ հայտարարագրել է 1800 դոլար և 790 հազար դրամ։

Վարչապետը, որպես աշխատավարձ, նշել է 11 միլիոն 931 հազար դրամ, վարկային գծով փոխառություն ունի 1 միլիոն 259 հազար դրամ։

Ըստ նշված տվյալների՝ Փաշինյանը շարժական ու անշարժ գույք չունի։ Փաշինյանի ընտանիքի մյուս անդամների հայտարարագրերը դեռ հրապարակված չեն։