Շուրջ 7 ամիս առաջ Կառավարության կողմից մասնավորին վաճառված Ծաղկաձորի գլխավոր մարզահամալիրի նոր սեփականատերը գործարքի դիմաց պարտավորվել էր 2 տարում 400 մլն դրամի ներդրում կատարել։ 

ՀՀ ԱԺ տնտեսական հարցերի մշտական հանձնաժողովի հերթական նիստում հանձնաժողովի նախագահ Բաբկեն Թունյանը Պետական գույքի կառավարման կոմիտեի նախագահ Առնակ Ավետիսյանից հետաքրքրվեց, թե ի՞նչ է ներդրումը եւ ինչպե՞ս է գնահատվելու՝ ներդրումը կատարվել է, թե ոչ։ Առնակ Ավետիսյանն իրեն ուղղված հստակ հարցին այդպես էլ չպատասխանեց՝ գործարքի առաջին տարում առնվազն 200 միլին դրամ վճարելու պարտավորություն ունեցող «Ծաղկաձորի սպորտային համալիր» ՍՊԸ-ի տնօրինությունը պետությանը վճարել է, թե ոչ։ 

«Ներդրումներ ասելով հասկանում ենք այն ծախսերը, որոնք կատարվում են եկամուտ ստանալու նպատակով։ Խոսքը հիմնական միջոցների ձեռքբերման, կապիտալ շինարարության ուղղությամբ կատարվող ծախսերի մասին է։ Կազմակերպությունը կատարել է ներդրումային ծրագիր, որտեղ հստակ նշված է, թե այդ ներդումները ինչ ուղղություններով են իրականացվելու։ Խոսքը համալիրի վերագործարկման, վերանորոգման, նոր հնարավորությունների եւ ենթակառուցվածքների հնարավորության մասին է, իսկ ներդրումային պարտավորոթյուններն ամեն տարի ներկայացվում են հաշվետվությունների տեսքով, որոնք ուսումնասիրվում են մեր կողմից»,-ասաց Ավետիսյանը։

Հիշեցնենք, որ Կառավարությունը «Ծաղկաձորի գլխավոր մարզահամալիր» ՓԲԸ-ն «Ծաղկաձորի սպորտային համալիր»-ին վաճառելու որոշումը կայացրեց 2022թ․-ի սեպտեմբերի 22-ի նիստում։ Որոշումն ընդունվեց առանց քննարկման ու զեկուցման։ Գույքը նախ անհատույց օտարվեց ՀՀ Պետական գույքի կառավարման կոմիտեին, ապա վաճառվեց մասնավորին։