«Ժողովուրդ» օրաթերթը գրում է.

«Ժողովուրդ» օրաթերթի տեղեկություններով՝ ՊՆ նախարար Սուրեն Պապիկյանն արդեն տեւական ժամանակ է՝ մեկուսացել է իր թիմակիցներից՝ ՔՊ-ականներից, գրեթե ոչ ոքի հետ չի շփվում, շփվելիս էլ խիստ զգուշավոր է: Եթե անգամ ՔՊ-ականները նրա հետ քննարկելու որեւէ հարց են ունենում, դիմում են նրան, Պապիկյանը խուսափում է թիմակիցների հետ հանդիպումներից, նրանց պատասխանում է կարճ-կոնկրետ՝ թող մնա, հետո կքննարկենք, հետո կտեսնենք:

ՔՊ-ականների համար տարօրինակ է Պապիկյանի այս պահվածքը, քանի որ վերջինս մշտապես լավ հարաբերություններ է պահպանել թիմակիցների հետ, փորձել է տարաձայնությունները հարթել թիմի ներսում. հիմա փոխվել է:

«Ժողովուրդ» օրաթերթը որոշ ժամանակ առաջ գրել էր, որ Նիկոլ Փաշինյանը նպատակ ունի պաշտոնից հեռացնել Պապիկյանին, քանի որ վերջինիս մեղադրում էր ՔՊ վարչության ընտրությունները կեղծելու, կուսակցության վարկանիշի հետ խաղալու համար, սակայն դա որեւէ կերպ չի հաստատվում:

Պապիկյանի պաշտոնանկության մասին լուրերը իսպառ փակվեցին, քանի որ Փաշինյանը այլ թեկնածու չուներ եւ առաջարկեց պաշտպանության նախարարին մնալ եւ շարունակել աշխատանքը:

Իսկ այս օրերին ՔՊ-ում չեն բարձրաձայնում, առերեւույթ ցույց չեն տալիս, բայց Փաշինյանի օրակարգում արդեն տեւական ժամանակ է՝ Պապիկյանի հեռացման հարցն էլի կա, պարզապես նրան դեռ փոխարինող չեն գտնում:

«Փաստ» օրաթերթը գրում է․

ՌԴ նախագահ Վլադիմիր Պուտինի հրավերով Նիկոլ Փաշինյանն աշխատանքային այցով մեկնել էր Մոսկվա ու մայիսի 9-ին Մոսկվայի Կարմիր հրապարակում ներկա գտնվել Հայրենական մեծ պատերազմում հաղթանակի 78-րդ տարեդարձին նվիրված զորահանդեսին:

Շատերի ուշադրությունը գրավեց այն հանգամանքը, որ Փաշինյանն անընդհատ դժգոհ էր, ինչ-որ թափթփվածություն էր նկատվում, դեմքից չէր թաքցնում տխրությունը: Այն, որ նրա հետ կապված հիմա ամեն ինչ «այնպես չէ», գաղտնիք չէ, բայց «անզեն աչքով» էլ նկատելի էր, որ այս դեպքում ինչ-որ բան առանձնահատուկ «այնպես չէ»: Մեզ հետ զրույցում Հայաստանի փորձառու դիվանագետներից մեկը, որ չցանկացավ ներկայանալ, նշեց, որ իրականում Նիկոլ Փաշինյանը որոշակի մեսիջներ էր հղում:

Ըստ դիվկորպուսի ներկայացուցչի, եթե դիվանագիտական լեզվից «թարգմանենք», ապա Նիկոլ Փաշինյանը հատկապես Արևմուտքին ցույց էր տալիս, որ ինքը, այսպես ասած, «պատանդի» կարգավիճակում է և իր կամքով չէ մասնակցում Հայրենական մեծ պատերազմում հաղթանակին նվիրված զորահանդեսին: Եթե իրոք այդպես է, ապա մնում է միայն կռահել, թե Ռուսաստանն ինչ ռեսուրսներ է կիրառել, որ կարողացել է նրան «բերման ենթարկել» Մոսկվա ու կանգնեցնել Կարմիր հրապարակի տրիբունայում:

«Հրապարակ օրաթերթը» գրում է․

Վարչապետի կնոջ` Աննա Հակոբյանի «Իմ քայլը հիմնադրամին» 9 մլն 662 հազար դրամ է փոխանցվել «Իզմիրլյան» հիմնադրամի կողմից։ Իզմիրլյան հիմնադրամը ստեղծվել է 1990 թվականին Դիկրան Իզմիրլյանի կողմից՝ ի հիշատակ իր ծնողների՝ Սարկիս և Մարի Իզմիրլյանների։ Հիմնադրամն իր պաշտոնական կայքում նշել է, որ հանդես է գալիս որպես «Սփյուռք–Հայրենիք համագործակցության խորհրդանիշ», մինչդեռ «Իմ քայլը» հիմնադրամի ստեղծող Աննա Հակոբյանի ամուսին Նիկոլ Փաշինյանը Չեխիայի հայ համայնքի հետ հանդիպման ժամանակ ասաց, որ «հայրենիքը նա է, որտեղ ապրում ես» եւ հայրենիքին չի կարելի որբանոցի նման վերաբերվել, այսինքն՝ Հայաստանը Հայաստանում չապրող հայերի՝ սփյուռքի հայրենիքը չէ․

«Մեր խնդիրն էն ա, որ մենք մի տեղ ապրել ենք, բայց մի ուրիշ տեղ հայրենիք ենք համարել, սովորաբար էնտեղ, որտեղ ապրել ենք, հայրենիք չենք համարել։ Եկեք հայրենիքը հեռվից սիրելու սովորությունը ավարտենք, հողերը դուք եք հանձնել, որ հաղթանակած հողը թողել եք, եկել երջանիկ կյանքով ապրում եք Պրագայում։ Մենք պետությանը պետք է դադարենք վերաբերվել որպես որբանոցի, 250 հազարով օգնել եք , պետության մեջ պետք է աշխատել, հարկեր գեներացնել և վճարել հարկերը»,- հայտարարեց Փաշինյանը՝ ի պատասխան Չեխիայում ապրող արցախահայի մեղադրանքների, որ նա հողեր է հանձնում։ Նշենք նաեւ, որ «Իզմիրլյան» հիմնադրամը «Իզմիրլյան» բժշկական կենտրոնի հիմնադիրն է` Մայր աթոռի հետ միասին, «Հայաստան» դաշինքի պատգամավոր Արմեն Չարչյանը ԲԿ-ի նախկին տնօրենն էր:

«Ժողովուրդ» օրաթերթը գրում է.

«Ժողովուրդ» օրաթերթի տեղեկություններով՝ երեկ Երեւանի ավագանու «Իմ քայլը» խմբակցության ղեկավար կազմը հավաքվել, նիստ է արել, քննարկել աշնանը կայանալիք Երեւանի ավագանու հերթական ընտրությունների հարցը: Այսպիսով, տեղեկացանք, որ քննարկման արդյունքում որոշում է կայացվել ընտրություններն անցկացնել սեպտեմբերի 17-ին:

Բացի այդ, ավագանու անդամները քննարկումների արդյունքում եկել են այն եզրակացության, որ մինչեւ սեպտեմբեր եղած ժամանակահատվածը պետք է ակտիվ օգտագործել եւ նախապատրաստվել աշնանը կայանալիք ընտրություններին: Ինչպես հայտնի է, ՔՊ ավագանու ցուցակը գլխավորելու է Տիգրան Ավինյանը, որն այժմ փոխքաղաքապետ է: Սպասվելու են թեժ ընտրություններ, քանի որ արդեն իսկ մեծ թվով կուսակցություններ են ընտրություններին մասնակցելու ցանկության մասին հայտարարել: Թերեւս դա է պատճառը, որ ղեկավար կազմը որոշել է կազմակերպել ավագանու ներկայիս անդամների ակտիվ ներգրավվածությունը հերթական ընտրություններին, եւ այդ պատճառով որոշվել է, որ ավագանու՝ արձակուրդ գնալուց հետո պետք է սկսվեն ակտիվ հանդիպումներ եւ քարոզարշավ:

«Ժողովուրդ» օրաթերթի հետ զրուցում Երեւանի ավագանու «Իմ քայլը» խմբակցության ղեկավար Արմեն Գալջյանը նշեց, թե նման քննարկում չի եղել, բայց մեր աղբյուրները պնդում են, որ նման քննարկում նեղ շրջանակում եղել է։