Ամերիկայի Միացյալ Նահանգների նախագահ Դոնալդ Թրամփը ստորագրել է գործադիր հրաման՝ Հաագայի Միջազգային քրեական դատարանի (ICC) նկատմամբ պատժամիջոցներ սահմանելու մասին՝ ի պատասխան Իսրայելի վարչապետ Բենիամին Նեթանյահուի նկատմամբ ձերբակալության օրդեր տալու։
Փետրվարի 6-ին Թրամփի ստորագրած հրամանի համաձայն՝ ՄՔԴ պաշտոնյաները, ովքեր աջակցում են դատարանի հետաքննություններին ԱՄՆ քաղաքացիների և դաշնակիցների, ինչպես նաև նրանց ընտանիքի անդամների դեմ, կենթարկվեն ԱՄՆ ֆինանսական և վիզային սահմանափակումների:
Փաստաթղթում ասվում է, որ ՄՔԴ-ն «անօրինական և չարդարացված գործողություններ է կատարել» Միացյալ Նահանգների և Իսրայելի դեմ և «առանց իրավական հիմքի հաստատել է իր իրավասությունը և նախնական հետաքննություն է սկսել Միացյալ Նահանգների քաղաքացիների և նրա որոշ դաշնակիցների, այդ թվում՝ Իսրայելի դեմ»: Թրամփն ասել է, որ դատարանը «հետագայում չարաշահել է իր լիազորությունները»՝ «անհիմն կալանավորելու հրամաններ տալով Իսրայելի վարչապետ Բենիամին Նեթանյահուի և պաշտպանության նախկին նախարար Յոավ Գալանտի դեմ»։
Բացի այդ, ԱՄՆ նախագահն ընդգծել է, որ ո՛չ Վաշինգտոնը, ո՛չ Իսրայելը չեն մտնում ՄՔԴ իրավասության ներքո։ Նա կարծում է, որ Հաագայի դատարանի գործողությունները խախտում են Միացյալ Նահանգների ինքնիշխանությունն ու սպառնում են երկրի աշխատանքին ազգային անվտանգության և արտաքին քաղաքականության ոլորտում։
2019 թվականին Միացյալ Նահանգներն արգելել էր մուտքը ՄՔԴ աշխատակիցներին, որոնք հետաքննում էին ամերիկացի քաղաքացիներին Աֆղանստանում օպերացիայի ընթացքում նրանց գործողությունների համար: Այդ ժամանակ դատարանը կասկածում էր ամերիկացի զինվորներին ու հետախույզներին այդ երկրում խոշտանգումներ կիրառելու համար։
2021 թվականին ԱՄՆ նախկին նախագահ Ջո Բայդենը չեղարկել էր պատժամիջոցները ՄՔԴ աշխատակիցների նկատմամբ, որոնք սահմանել էր Թրամփի վարչակազմն իր առաջին ժամկետի ընթացքում։
Իսրայելի վարչապետ Բենիամին Նեթանյահուն շնորհակալություն է հայտնել ԱՄՆ նախագահ Դոնալդ Թրամփին՝ ՄՔԴ-ի դեմ պատժամիջոցներ սահմանելու համար։
«Շնորհակալություն, նախագահ Թրամփ, ՄՔԴ-ի վերաբերյալ ձեր համարձակ գործադիր հրամանի համար: Նա կպաշտպանի Ամերիկան և Իսրայելը հակաամերիկյան, հակասեմական, կոռումպացված դատարանից, որը իրավասություն կամ հիմք չունի մեզ հետապնդելու համար»,- նշել է վարչապետը սոցցանցերում: