Լեհաստանի վարչապետ Դոնալդ Տուսկի և երկրի այլ բարձրաստիճան պաշտոնյաների նկատմամբ հետաքննություն է սկսվել պետական հեղաշրջում կազմակերպելու կասկածանքով։ Այս մասին հայտարարել է Լեհաստանի Սահմանադրական դատարանի նախագահ Բոգդան Սվիչկովսկին, գրել են ԶԼՄ-ները։
«Հունվարի 31-ին ես ստորագրել եմ վարչապետի, նախարարների, Սեյմի և Սենատի խոսնակների, իշխող կոալիցիայի պատգամավորների և սենատորների, ինչպես նաև մի շարք դատավորների, դատախազների և այլ անձանց կողմից պետական հեղաշրջման հանցագործության կատարման իրավական կասկածի մասին 60 էջանոց ծանուցում»,- ասել է Սվիչկովսկին։
Ի պատասխան՝ Տուսկը իր սոցցանցում տեսանյութ է հրապարակել, որում սեղանի թենիս է խաղում։ Տեսանյութում Տուսկին պատմում են, որ ընդդիմադիր «Օրենք և արդարություն» կուսակցության առաջնորդ Յարոսլավ Կաչինսկին նրան մեղավոր է համարում պետական հեղաշրջման համար։ «Հանգիստ։ Մենք այստեղ լուրջ գործեր ունենք։ Մենք դրանով ավելի ուշ կզբաղվենք»,- ծիծաղելով պատասխանում է Տուսկը։
Լեհաստանի նախագահ Անջեյ Դուդայի խոսքով՝ սա գործադիր իշխանությունն իրականացնող անձանց կողմից օրենքի կրկնակի խախտումների շարան է։