ՀՀ ՊՆ նախկին նախարար Դավիթ Տոնոյանը օրերս հայտարարել էր, թե միջնորդություն է ներկայացրել Հակակոռուպցիոն դատարան՝ խնդրելով թույլատրել, որ ներկայանա ԱԺ քննիչ հանձնաժողովի նիստին: Նա նշել էր, որ որոշել է բացատրություններ տալ՝ արձագանքելով Նիկոլ Փաշինյանի եւ ԳՇ նախկին պետ Օնիկ Գասպարյանի հայտարարություններին:

44-օրյա պատերազմի հանգամանքներն ուսումնասիրող քննիչ հանձնաժողովի նախագահ Անդրանիկ Քոչարյանն էլ հայտարարել է՝ եթե դատարանը դրական արձագանքի Դավիթ Տոնոյանի միջնորդությանը, ապա օգոստոսի 1-ին նիստ  կհրավիրվի։

Վերջինս նույնպես Տոնոյանի համար միջնորդել է դատարանին։

MediaHub-ը Տոնոյանի փաստաբան Սերգեյ Հովհաննիսյանից հետաքրքրվեց, թե ինչ փուլում է գործընթացը։ Փաստաբանը պատասխանեց, որ Տոնոյանի դիրքորոշումը չի փոխվել։

«Դատարանի որոշում դեռ չկա, միանշանակ չէ, որ միջնորդությունը կբավարարվի»,-ասաց նա։

Հարցին, թե ինչը կարող է խոչընդոտել, փաստաբանն ասաց՝ օրենսդրական խնդիրներ կան կալանավորված անձին տեղափոխելու հետ կապված:

Հիշեցնենք, Դավիթ Տոնոյանն անցնում է ռազմամթերքի մատակարարման չարաշահմանն առնչվող քրեական գործով: Նա կալանավորվել է 2021 թվականի սեպտեմբերի 30-ին:

Լիաննա Թորոսյան