Լեռնային Ղարաբաղի բնակչության անվտանգության ապահովման հարցերը պետք է երաշխավորվեն Ստեփանակերտ-Բաքու երկխոսության միջազգային մեխանիզմների շրջանակներում, իսկ Հայաստանի և Ադրբեջանի միջև պետք է խաղաղության պայմանագիր ստորագրվի: Այս մասին Կառավարության նիստի մեկնարկին հայտարարեց Նիկոլ Փաշինյանը:
Նա նշեց, որ Լաչինի միջանցքի ապօրինի շրջափակման հետեւանքով հումանիտար ճգնաժամը ԼՂ-ում օր օրի սրվում է, մատակարարումներ իրականացնելու հնարավորություն չունեն նույնիսկ այնտեղ տեղակայված ռուս խաղաղապահները, բնական գազի և էլեկտրաէներգիայի մատակարարումները նույնպես ամիսներ շարունակ խափանված են Ադրբեջանի կողմից: Այս ամենի ֆոնին, շարունակեց Փաշինյանը, տեսնում ենք ադրբեջանական հռետորաբանության եւ քարոզչության շարունակական սրում հատկապես ԼՂ-ի ուղղությամբ: Բայց ՀՀ իշխանությունը, այդուհանդերձ, խաղաղության օրակարգից չի հրաժարվում.
«Չեն դադարում Հայաստանի հասցեին հնչող ադրբեջանական անհիմն մեղադրանքները: Ադրբեջանը շարունակում է Հայաստանից պահանջել ԼՂ-ից դուրս բերել Հայաստանի բանակի ստորաբաժանումները այն պայմաններում, երբ ՀՀ-ն ԼՂ-ում զինվոր չունի: Արձանագրում եմ ևս մեկ անգամ՝ Լեռնային Ղարաբաղում Հայաստանի բանակ չկա, ԼՂ-ում գործում է ԼՂ պաշտպանության բանակը, որի գոյության պատճառները յուրաքանչյուր ոք ամեն օր կարող է գտնել Ադրբեջանի պաշտոնական քարոզչության եւ գործողությունների մեջ, որի անթաքույց էությունը ԼՂ հայերին էթնիկ զտման եւ ցեղասպանության ենթարկելն է»,-հայտարարեց Փաշինյանը:
Նա հավելեց, որ այդ քաղաքականության սողացող իրագործումն էլ հենց տեսնում ենք այսօր Լեռնային Ղարաբաղում: