Ամերիկյան կողմը հրաժարվել է անվտանգության երաշխիքներ ներառել Ուկրաինայի հետ օգտակար հանածոների արդյունահանման ոլորտում համագործակցության մասին համաձայնագրերի նախագծում։ Այս մասին հայտնել է CNN-ը՝ հղում անելով սեփական աղբյուրներին։
Ըստ հեռարձակողի՝ համաձայնագրում նման կետերի ներառումը ներկայումս աջակցություն չի գտնում Վաշինգտոնում։
Ուկրաինական կողմը հույս ունի անվտանգության երաշխիքների հարցը քննարկել երկու երկրների նախագահների ծրագրված հանդիպմանը: Կիեւի աղբյուրը հաստատել է ուկրաինական կողմի պատրաստակամությունը բանակցությունների համար և հայտարարել համաձայնագրի նախագծում նախկինում առկա բոլոր խնդրահարույց հարցերի լուծման մասին։
Սակայն նախագահների հանդիպման կոնկրետ ժամկետները և ծրագրված օրակարգի մանրամասները մնում են անորոշ:
Այս համաձայնագրին է անդրադարձել նաև Մեծ Բրիտանիայի նախկին վարչապետ Բորիս Ջոնսոնը Յալթայի Եվրոպական ռազմավարության համաժողովում:
«Դա կողոպուտ է, այդպես էր լենդ-լիզը 1941 թվականին»,- ասել է Ջոնսոնը՝ խոսելով Ուկրաինայի հետ Թրամփի նորացված տնտեսական գործարքի մասին:
Նա նշել է, որ տեսել է փաստաթղթի վերջին նախագիծը և կարծում է, որ այն ավելի ձեռնտու է Ուկրաինային, քան առաջին տարբերակը։ «Ես նայում եմ այս փաստաթղթին և դրական բաներ եմ տեսնում Ուկրաինայի համար։ Կարծում եմ՝ այն հույսի և առաջընթացի սերմեր է պարունակում»,- ասել է Ջոնսոնը: