Այսպես թե այնպես, Թուրքիայի ներկայությունը և՛ տեսնում, և՛ զգում ենք բանակցություններում․ դա կա։ Այդ մասին այսօր իր ասուլիսի ընթացքում ասաց Նիկոլ Փաշինյանը։
Նա նշեց, որ Թուրքիայի հետ մենք խոսում ենք, և Թուրքիայի նախագահի հետ ինքն ունի երկխոսություն, որը շատ բարդ է, բայց և կարևոր։
«Էս ընդհանուր պրոցեսների մեջ բաներ կան, որ չես էլ հասկանում՝ էդ ինչի՞ է դա էդքան դժվար։ Ես հիշում եմ՝ մեր քննարկումները, ընկալումներն ու զգացումները, երբ ես Պրահայում Թուրքիայի նախագահի հետ շփում ունեցա։ Այդ հանդիպումից լուսանկար կար, համացանցում էր հայտնվել ու դրա շուրջ աղմուկ կար։ Ես հիշում եմ՝ մեր շատ թիմակիցներ ՀՀ-ում դրանից լարվել էին։ Բայց դա տարօրինակ էր․ երկու երկիր, որ ընդհանուր սահման ունեն, իրար հետ խոսակցություն չունեն»,- նշեց նա։
Նրա խոսքով՝ բարդ է եղել որոշում ընդունելը՝ Թուրքիայի նախագահի երդմնակալությանը գնալու վերաբերյալ։
«Մենք հո օդից չենք ընկել, գիտենք, թե ինչ կա մեր ենթագիտակցության մեջ։ Դա պիտի լիներ, ու ուրախ եմ, որ այսօր մեր հատուկ ներկայացուցիչները մշտական կապի մեջ են»,- ասաց նա։