MediaHub.am-ը տուրիստական ընկերությունների հետ անցկացրած հարցազրույցի ընթացքում պարզել է, թե հիմնականում ՀՀ-ի ո՞ր տարածքներում են ցանկանում իրենց հանգիստն անցկացնել հայերը, ինչպես նաև՝ որ երկրներից են գալիս Հայաստան՝ հանգստանալու։

«Hyur Service» ընկերությունից հայտնում են, որ հիմանկանում նախընտրելի վայրեր են՝ Սևանը, Դիլիջանը, Տաթևը, Խոր Վիրապը, Նորավանքը։

Մեծամասամբ սփյուռքի հայերը ՌԴ-ից, ԱՄՆ-ից, Լիբանանից են դիմում տվյալ տարածքներում հանգստանալու համար։

«Օne way» տուրիստական ընկերությունից մեզ հայտնեցին, որ հայերը հիմնականում նախընտրում են առողջարանային հանգիստը՝ Աղվերան, Հանքավան, Ջերմուկ, Ծաղկաձոր, եթե, իհարկե, խոսքը երկարաժամկետ հանգստի մասին է:

Ինչպես հայտնեցին ընկերությունից, տվյալ վայրերում հյուրանոցային հանգստի համար սահմանված արժեքները բավականին բարձր են՝ ՀՀ-ի բյուջեյի համեմատ, սակայն միևնույն է, այդ վայրերում հանգստացողների պակաս չկա։

Եթե, օրինակ, միջին աշխատավարձը, ենթադրենք, 100 հազար դրամ է, Ջերմուկում երեք անգամյա սնունդով և բուժումներով, մեկ գիշերվա համար, երկու անձի դեպքում արժեքը սկսվում է 30-40 հազար դրամից։

Հարցին՝ կան արդյոք մարզեր, որտեղ համեմատաբար ավելի ցածր գնով կարելի է կազմակերպել հանգիստը, ընկերությունից հայտնեցին, որ Երևանից ավելի հեռու բնակավայրերում մատչելի են գները, օրինակ, Գորիս, Սիսիան, սակայն սրանց պարագայում էլ առաջանում է երկար ճանապարհի խնդիր, ինչն էլ ենթադրում է ավելի շատ ճանապարհածախս, արդյունքում, գրեթե ստացվում է նույն գինը, ինչ մյուս հանգստի վայրերի դեպքում։

«One way» տուրընկերությունից ճշտեցինք, արդյոք սահմանամերձ տարածքներում հանգիստ նախընտրողների թիվը չի նվազել՝ պայմանավորված սահմանային իրադարձություններով, նշեցին, որ այո, բնակչության ինչ-որ հատվածի մոտ լինում է նման մտավախություն, սակայն միևնույն է, գնացողներն էլ քիչ չեն։

Օտարերկրյա զբոսաշրջիկների շրջանում, ինչպես հայտնում են տուրընկերությունից, ամենամեծ թվով այցելուներ գալիս են ՌԴ-ից, սակայն նաև շատ է հոսքը ՀՀ տարածք այն երկրներից, որտեղից կան ուղիղ չվերթներ՝ ՌԴ, Իրան, Արաբական Միացյալ Էմիրությոններ, ԱՄՆ, եվրոպական երկրներից՝ Գերմանիա, Ֆրանսիա, Ավստրիա։

Հարցին՝ արդյոք պատերազմից հետո օտարերկրյա զբոսաշրջիկների թիվը նվազել է ՀՀ-ում, հայտնեցին, որ միանշանակ, ազդեցություն ունեցել է 44-օրյա պատերազմը, բայց պակաս չի եղել նաև ռուս-ուկրաինական պատերազմի ազդեցությունը, քանի որ եվրոպական մի շարք երկրներից մտավախություն կար պատերազմի առումով, սակայն երբ այն ձգձգվեց, սկսեցին էլի գալ։

Մերի Գևորգյան