Ռուսաստանը պատրաստ է ԱՄՆ-ի հետ իրավիճակի ցանկացած զարգացման, եթե Վաշինգտոնը որոշի խզել դիվանագիտական հարաբերությունները, Մոսկվան կդիմանա դրան, երեքշաբթի օրը կայացած ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով ԱՄՆ Սենատում կոչը` Ռուսաստանը հռչակել ահաբեկչության հովանավոր պետություն.
«Ամերիկացի օրենսդիրները, այդ թվում Ներկայացուցիչների պալատի խոսնակ Փելոսին, ըստ երևույթին, հակառուսական եռանդով անցել են պատժամիջոցների բոլոր գործիքները, որոնք, մեծ հաշվով, անարդյունավետ էին, և արդեն սկսել են մշակել այնպիսի՝ իրենց կարծիքով հզոր զենքեր, ինչպիսին Մոսկվային, ինչպես ասում են, ահաբեկչության հովանավոր հռչակելն էր»,-ասել է նա։
Զախարովան նշել է, որ նման քայլի տրամաբանական արդյունքը կարող է լինել դիվանագիտական հարաբերությունների խզումը, «որից հետո Վաշինգտոնը սպառնում է վերջնականապես հատել անդառնալի սահմանը՝ դրանից բխող բոլոր հետևանքներով»։ Նրա խոսքով՝ ԱՄՆ-ն ի վիճակի չէ ճնշել այն ռեժիմներին, որոնց ամերիկացիներն անվանում են ահաբեկչական։
Հուլիսի 27-ին ԱՄՆ Սենատը բանաձեւ է ընդունել՝ կոչ անելով Պետդեպարտամենտին ճանաչել Ռուսաստանը որպես ահաբեկչության հովանավոր պետություն։ Փաստաթղթում համապատասխան որոշման պատճառ են անվանում Չեչնիայում, Վրաստանում, Սիրիայում և Ուկրաինայում տեղի ունեցող իրադարձությունները։
Ավելի վաղ Կիևը դիմել էր Վաշինգտոնին՝ Ռուսաստանին ցուցակում ներառելու խնդրանքով։ Ահաբեկչությունը հովանավորողների ցանկում կարող են ներառվել պետություններ, որոնք, Վաշինգտոնի կարծիքով, «բազմիցս աջակցել են միջազգային ահաբեկչական գործողություններին»։
Հուլիսի 28-ին երկու կուսակցությունների մի խումբ կոնգրեսականներ հայտարարել էին, որ մտադիր են նմանատիպ փաստաթուղթ ներկայացնել Ներկայացուցիչների պալատ։