ԱՄՆ պետքարտուղար Էնթոնի Բլինքենը երեկ զրույց է ունեցել Ադրբեջանի նախագահ Իլհամ Ալիևի հետ, որի ընթացքում կոչ է արել ազատ արձակել մնացած բոլոր հայ գերիներին։

Ի՞նչ սպասել այս հայտարարությունից, ի՞նչ հնարավոր զարգացումներ կարող են լինել․ այս և այլ հարցերի շուրջ MediaHub.am-ը զրուցել է միջազգայնագետ Գրիգոր Բալասանյանի հետ։

Նրա խոսքով՝ այս քայլով ԱՄՆ-ն հերթական անգամ փորձում է մեր ցավն օգտագործել իր շահերն առաջ տանելու համար։

«Նահանգները փորձում են մեզ ցույց տալ, թե հայ գերիների հարցն իրեն շատ է հուզում, որ իրենք օր ու գիշեր զբաղվում են հայ ռազմագերիների հարցով։ Չնայած իրենք էլ գիտեն, որ իրենց կոչն Ադրբեջանի համար որևէ նշանակություն չունի։ Սա հերթական մանիպուլյացիան է»,- նշեց միջազգայնագետը։

Գրիգոր Բալասանյանը հիշեցրեց, որ նման հայտարարություններ լինում են միշտ՝ սկսած Հայոց ցեղասպանությունից մինչև ռազմագերիների հարց։ Ըստ նրա՝ դա զուտ հայ հասարակության մեջ սպասումներ արթնացնելու համար է արվում։

«Այս քայլով նաև փորձ է արվում Հայաստանին որոշակիորեն կտրել իր բնական դաշնակիցներից ու գործընկերներից։ Դրա օրինակներից է նաև ԵԱՀԿ Մինսկի խմբի մասին հայտարարությունը, որը հակասում է ՌԴ տեսակետին»,- նկատեց նա։

Միջազգայնագետը հիշեցրեց, որ ՌԴ արտգործնախարար Սերգեյ Լավրովը հայտարարել է, թե ԵԱՀԿ Մինսկի խումբը դե ֆակտո չի գործում, մինչդեռ ԱՄՆ-ն փորձում է ցույց տալ, որ խնդրի կարգավորումը հենց Մինսկի Խմբի դաշտում է։

«ԱՄՆ-ն առաջին անգամը չէ, որ փորձում է օգտագործել ՄԽ ձևաչափը՝ ցույց տալու, թե ինքը շահագրգռված է տարածաշրջանում խաղաղության ամրապնդմամբ, և որ ՄԽ ձևաչափն է Արցախի խնդրի կարգավորման գլխավոր և միակ միջոցը։ Սակայն, առնվազն 44-օրյա պատերազմից հետո ՄԽ-ն չի աշխատում, և չի էլ կարող աշխատել, քանի որ խորքային խնդիրները, որոնք գոյություն ունեն խմբի անդամ պետությունների միջև, թույլ չեն տա այդ ձևաչափը վերակենդանացնել»․- նկատեց նա։

Գրիգոր Բալասանյանը ևս մեկ անգամ շեշտեց՝ սա ԱՄՆ-ի կողմից հերթական մանիպուլյացիան է՝ Հայաստանին Ռուսաստանից հեռացնելու համար։


Նարե Գևորգյան