Տևական ժամանակ է քաղաքացիներն ահազանգում են, որ Հայաստանում ջրի որակը վերջին ամիսներին կտրուկ վատացել է և նրանք չեն կարողանում պատշաճ կերպով օգտվել ծորակի ջրից։
Ջրի որակի տարբերություն նկատում են հատկապես Էրեբունի վարչական շրջանի բնակիչները, մասնավորապես՝ Արցախի պողոտայում։
“Ջրի խնդիրը միայն մեր շենքում չէ, ձմռանը նորմալ ջուր է եղել, իսկ հունիս ամսվանից սկսած ծորակից ջուր խմել չի լինում”,- նշեց Արցախի պողոտայի բնակիչ, լրագրող Արմինե Գևորգյանը:
Մեր զրուցակցի հավաստմամբ՝ երբ բացում է ծորակը, ահավոր ջրհորի հոտ է գալիս, ապակու վրա սպիտակ հետքեր են մնում ու ուղղակի անհնար է այդ ջուրը օգտագործել հատկապես խմելու նպատակով. Նախ, վախենում ես, որ վնաս կլինի օրգանիզմիդ, հետո էլ անտանելի վատ համ ունի:
«Հետևաբար ես և ինձ նման շատ մարդիկ խմելու ջուրը գնում են: Ես դեռ մենակ եմ ապրում ու քիչ եմ գնում ջուր, իսկ 5-6 հոգանոց ընտանիքի համար դա հավելյալ ու լուրջ ծախս է»,- ասաց նա:
Ի՞նչ են ասում պատասխանատուները, արդյո՞ք լուռ են՝ որպես ավանդույթ.
«Դիմել էինք «Վեոլիա ջրին», որի արդյունքում պարզվեց, որ ջրի խնդիր է առաջանում և ջրերը խառնում են իրար՝ արտեզյան ջրերը խառնվում է նորմալ ջրին հոսքն ապահովելու համար, որի արդյուքնում էլ ջրի որակը ընկնում է”, -նշեց Գևորգյանը։
Արմինեն շեշտեց՝ ոչ միայն խմելն է վտանգավոր, այլև անգամ լվացքի վրա են սպիտակ հետքեր մնում, հատկապես սև շորերի վրա։
«Իրոք, չգիտեմ դա ինչ խնդիր է: «Վեոլիա ջրից» մեզ ասացին, որ ոչ մի խախտում չկա, ամեն ինչ նորմայի սահմաններում է, իրենք առողջապահության նախարարությունից բողոքներ չունեն, այլ գերատեսչության հետ խնդիրներ չունեն և այլն, սակայն փաստն այն է, որ մեր կենցաղը ամբողջությամբ մի մեծ խնդիր ու բնակիչներիս համար գլխացավանք է դարձել: Ինչպե՞ս հանգիստ վերաբերես այն ջրին, որն աօպակու վրա սպիտակ հետքեր է թողնում, ու դա մենք պետք է խմե՞նք”,- հավելեց Արմինե Գևորգյանը:
Ի դեպ, որպես ապացույց բարձրացված խնդրի, օրեր առաջ նա նաև տեսանյութ է հրապարակել ֆեյսբուքյան իր էջում, բայց ոչինչ չի փոխվել իր ու էրեբունցիների կյանքում: «Վեոլիա ջուրը» ինչպես անհաղորդ էր, այդպես էլ շարունակում է մնալ այդպիսին և, փաստացի, ոչ մի պետական մարմին որևէ ուժ չունի այս ընկերությանը սաստելու և ստիպելու հարգել քաղաքացիների իրավունքները ու նրանց պատշաճ ծառայություններ մատուցել:
Հիշեցնենք, որ այսօր քաղաքապետ Տիգրան Ավինյանն էլ գործակարգավարական խորհրդակցության ժամանակ դարձյալ իր դժգոհությունը հայտնեց նշված խնդրի վերաբերյալ՝ նշելով, որ ջրի առաջին շահառուն Երևան քաղաքն է.
««Միգուցե սխալ է զգացողությունը, բայց միանշանակ զգացողություն է առաջացնում, որ այդ ջուրը խմելը շատ դրական փորձառություն չէ։ Արտեզյան ջրերի ծավալները «Վեոլիա ջուր»-ը որոշակի պակասեցրել է, բայց սա հիմնական խնդիրներից է, որը պետք է վերջնականապես լուծենք։ Ինչ-որ մի փուլից այդ խառնուրդը պետք է առհասարակ վերացնենք»,- ասել է նա։
Ապա բողոքել, թե՝ «լավ կլիներ՝ այսօր լսեինք «Վեոլիա ջրի» զեկույցը, բայց, ինչպես հասկանում ենք, չենք լսելու», և պատկան մարմինների ուշադրությունը հրավիրել խնդրի վրա:
Վիկա Աբգարյան