Հունիսի 1-ը շատ երկրներում նշվում է որպես երեխաների պաշտպանության միջազգային օր (International Children's Day):
Տոնն առաջին անգամ նշվել է 1950 թվականին։ Սակայն այն հաստատվել է 1949 թվականին Փարիզում Կանանց միջազգային դեմոկրատական ֆեդերացիայի կողմից։
Երեխաների պաշտպանության միջազգային օրը ամենահին միջազգային տոներից մեկն է։ Տոնի հիմնադրման մասին որոշումը կայացվել է դեռևս 1925 թվականին Ժնևում կայացած համաշխարհային համաժողովի ժամանակ, որը նվիրված էր երեխաների բարեկեցության հարցերին։
Թե ինչու հենց հունիսի 1-ին՝ վարկածներից մեկի համաձայն՝ 1925 թվականի հունիսի 1-ին Չինաստանի գլխավոր հյուպատոսը Սան Ֆրանցիսկոյում հավաքել էր չինացի ծնողազուրկ երեխաներին և նրանց համար կազմակերպել Դուան-ու ցզե տոնը ։ Երջանիկ պատահականությամբ՝ այդ օրը համընկել էր Ժնևում «մանկական» համաժողովի անցկացման շրջանի հետ։
Նույն օրը նշվում է ևս մեկ հուզիչ տոն՝ Ծնողների համաշխարհային օրը, որը հռչակվել է ՄԱԿ-ի Գլխավոր Ասամբլեայի 66-րդ նստաշրջանի ընթացքում (66/292 բանաձև)` 2012 թվականի սեպտեմբերին, և սկսած 2013 թվականից՝ նշվում է ամեն տարի ամռան առաջին օրը՝ «աշխարհում բոլոր ծնողների պատվին»։
Նշենք, որ տոնի նպատակն է՝ հիշեցնել մոլորակի բնակիչներին համամարդկային արժեքների մասին, պաշտպանել և ամրապնդել դրանք՝ որպես ամուր և բարոյապես կայացած ընտանիքի հիմք։
ՄԱԿ-ի Գլխավոր Ասամբլեան կոչ է անում Միավորված ազգերի կազմակերպության բոլոր անդամ պետություններին միանալ Ծնողների օրվա տոնակատարությանը, և նշել այն քաղաքացիական հասարակության հետ բազմակողմանի գործընկերության շրջանակում՝ ներգրավելով երիտասարդությանը և երեխաներին։
Հայաստանը Երեխաների իրավունքների մասին կոնվենցիան վավերացրել է 1990 թվականին, 1996 թվականին ընդունվել է «Երեխայի իրավունքների մասին» ՀՀ օրենքը։ Տոնը նշում են հանրապետության բոլոր մարզերում և Երևանում, ամեն տարի կազմակերպվում են տարատեակ միջոցառումներ։