Ապարանի տարածքում օրերս տեղի ունեցած արյունալի միջադեպից հետո «Արմենիա» բժշկական կենտրոնում հոսպիտալացված երկու քաղաքացիներից մեկի վիճակը շարունակում է մնալ ծայրահեղ ծանր, սակայն ստաբիլ է․ վատացում չկա։ Այս մասին MediaHub.am-ը տեղեկացավ բժշկական կենտրոնի գլխավոր տնօրենի վիրաբուժության գծով տեղակալ Աշոտ Կուրղինյանից:

«Մյուս քաղաքացին, որը թոքերի շրջանում վնասվածք ուներ, այժմ ինքնուրույն շնչում է․ դրական դինամիկա կա։ Նույնիսկ այսօր կամ գուցե վաղն արդեն սովորական բաժանմունք կտեղափոխվի»,-ասաց նա։

«Աստղիկ» ԲԿ-ից էլ հայտնեցին, որ իրենց մոտ հոսպիտալացված քաղաքացին ապաքինման փուլում է․ կյանքին վտանգ չի սպառնում։

Հիշեցնենք, որ հունիսի 19-ին Ապարանի Նիգավան գյուղի տարածքում մի խումբ անձանց մասնակցությամբ միջադեպ էր տեղի ունեցել։ 32-ամյա տղամարդն իր մոտ գտնվող հրացանից կրակոցներ է արձակել իրենց հետ վիճաբանող անձանց ուղղությամբ։ Կրակոցների հետևանքով հրազենային վնասվածքներով Ապարանի բժշկական կենտրոն տեղափոխված երկու անձ՝ Ապարան քաղաքի 27-ամյա բնակիչներ, հիվանդանոցում մահացել են։ Եվս 5 անձ տեղափոխվել է բժշկական կենտրոններ: 32-ամյա տղամարդը ձերբակալվել է:

Քննչական կոմիտեն պարզել էր Ապարան քաղաքում երկու անձի սպանության դեպքի մի շարք հանգամանքներ, այդ թվում՝ դրդապատճառը:

Լիաննա Թորոսյան