Ես 2018-ին փողոց եմ դուրս եկել որպես քաղաքացի, որը դեմ էր գործող վարչակարգին, ու հետո առաջարկ եմ ստացել՝ միանալու քաղաքական թիմին որպես մասնագետ։ Այդ մասին այսօր «Զանգ» շարժման ակցիայի ընթացքում ասաց ադրբեջանագետ Տաթևիկ Հայրապետյանը՝ անդրադառնալով իր հասցեին հնչող քննադատություններին, թե իրեն Նիկոլ Փաշինյանն է բերել քաղաքականություն, իսկ այսօր ինքը դուրս է եկել հենց Փաշինյանի դեմ։

Նա նշեց, որ պատերազմի ժամանակ Փաշինյանը եթե արտախորհրդարանական ուժերի հետ հանդիպել է, ապա ֆռակցիայի հետ ընդամենը մի հանդիպում է ունեցել, այն էլ իր նախաձեռնությամբ։

«Դա հոկտեմբերի ամսին էր, երբ ես վերադարձա Շուշիից ու խնդրեցի հանդիպում։ Հոկտեմբերն էր, ու Նիկոլ Փաշինյանին ես ասացի, թե ինչ վատ է վիճակը։ Դրանից հետո նոյեմբերի 13 կամ 14-ին ենք մենք իրեն հանդիպել, ու ես, իր աչքերին նայելով, ասել եմ՝ «դու պարտված ղեկավար ես, ու մեր թիմն էստեղ կառավարելու իրավունք չունի»։ Ու կապ չունի, որ ես տեղյակ չեմ եղել՝ ինչ է եղել, բայց ասացի՝ «մենք էլ անելիք չունենք»։ Ինքն էլ ասաց՝ «պետք է գնանք խորհրդարանական ընտրությունների, ժողովրդավարական ճանապարհ կա»։ Մինչդեռ ես ասում էի՝ «մենք անգամ ընտրություններին չենք կարող մասնակցել, քանի որ «պռավալ» ենք տվել»»,- պատմեց Հայրապետյանը։

Նա նշեց, որ Փաշինյանի հետ վերջին անգամ հանդիպել է 2021-ի ապրիլին, երբ ինքը հերթով կանչել է պատգամավորներին ու հարցրել, թե ով ինչ պաշտոն է ուզում։

«Ես իրեն ասացի՝ «եթե չպատժենք Ադրբեջանին, պատուհան ենք բացելու նոր զիջումների համար»։ Ու ասացի՝ «եթե չենք պայքարելու, ես անելիք չունեմ քո թիմում»։ Դրանից հետո ես իր մերձավորներից ստացել եմ տարբեր առաջարկներ, որոնք մերժել եմ»,- ներկայացրեց նախկին պատգամավորը։

Մանրամասները՝ տեսանյութում։