Սպասում ենք դատարանը որոշում կայացնի․ երկուսի նկատմամբ էլ կալանավորման միջնորդություն է ներկայացվել դատարան։ Այս մասին այսօր MediaHub.am-ին փոխանցեց ՀՀ Քննչական կոմիտեի նախագահի մամուլի քարտուղար Վարդան Թադևոսյանը՝ խոսելով Պեմզաշենում ընտանիքի սպանության մեղավորների կալանավորման մասին։ 

«Չեմ կարող ասել, թե որոշումը երբ կհրապարակվի։ Երբ հրապարակվի, անիմջապես տեղյակ կպահենք»,-ասաց նա։ 

Հիշեցնենք, որ նոյեմբերի 9-ին Շիրակի մարզի Պեմզաշեն գյուղի տներից մեկում հայտնաբերվել էր Պեմզաշեն գյուղի՝ 31-ամյա բնակչուհու և վերջինիս 11-ամյա դստեր և 8-ամյա որդու դիերը։ Փաստի առթիվ նախաձեռնված քրեական վարույթի շրջանակներում իրականացված քննչական և վարույթային անհրաժեշտ գործողությունների, ինչպես նաև ՀՀ ոստիկանության համապատասխան ստորաբաժանման աշխատակիցների հետ համատեղ իրականացված միջոցառումների արդյունքում պարզվել է առերևույթ հանցագործություն կատարած անձի ինքնությունը՝ Շիրակի մարզի 32-ամյա բնակիչ։ 

Ավելի ուշ ձերբակալվել է ևս մեկ անձ։ Քննչական կոմիտեն նաև այսօր լրատվամիջոցներին հայտնել էր, որ Պեմզաշենում 31-ամյա կնոջը և նրա երկու երեխային դաժանաբար սպանելու մեջ կասկածվող տղամարդկանցից մեկը սեռական ոտնձգություն է կատարել 12–ամյա աղջկա նկատմամբ։ 

Լիաննա Թորոսյան