Մասկի-շոու է, բեմադրություն փիառի համար հանրությանը ներկայացվող։ Այս մասին MediaHub.am-ի հետ զրույցում ասաց ԱԺ «Հայաստան» խմբակցության ղեկավար, պաշտպանության նախկին նախարար Սեյրան Օհանյանը՝ անդրադառնալով Արցախի ՊԲ նախկին հրամանատար Միքայել Արզումանյանին առաջադրված մեղադրանքին։
«Հանրությանը շեղելու, ապատեղեկատվություն տարածելու համար է, և երկրորդը իրենց կառուցողական գործընկերոջը, որի հետ այսօր Բրյուսելում հանդիպելու է, հաշվետվություն ներկայացնելու համար է»,֊ ասաց նա։
Ինչ վերաբերում է Միքայել Արզումանյանի անձին, Օհանյանը նշեց.
«Ես նրան ճանաչում եմ և օպերատիվ մարտավարական օղակներում ղեկավարելիս ինքը եղել է հմուտ, համարձակ հրամանատար, իր առջև դրված խնդիրները կատարել է»,-ասաց նա։
Ինչ վերաբերում է 44-օրյա պատերազմի ժամանակ Միքայել Արզումանյանի գործողություններին, ապա գեներալ- գնդապետն ասաց․
«Հաշվի առեք մեկ բան, որ 10-12 օր է նա իրականացրել մարտական գործողությունների կառավարում։ Այն էլ այն ժամանակահատվածում, որ, կարելի է ասել, բանը բանից անցած է եղել արդեն։ Ինչ վերաբերում է կոնկրետ Շուշիին, ես Շուշիին այդպես չեմ նայում, ես Շուշին նայում եմ 44-օրյա պատերազմի պաշտպանողական օպերացիայի համատեքստում մնացած գործողությունների հետ հավասարաչափ։ Օրինակ՝ Հորադիզ, Ջրական, Ֆիզուլի, Հադրութի հատված, Կարմիր շուկայի, Ասկերանի վերին ենթաշրջանի մարտական գործողություններ և Շուշի։ Բոլոր ուղղություններով էլ պատասխանատուներ են եղել և բոլոր ուղղություններով էլ պատասխան պետք է կրեն»,-ասաց նա։
Սեյրան Օհանյանն ասաց, որ թատերականացված, բեմականացված գործողություններով իրենք փորձում են և միշտ էլ փորձելու են պատասխանատվությունը գցել բանակի հատկապես ներքևի՝ մարտավարական օղակների հրամանատարների վրա։
«Ես այս ամենին այլ տեսանկյունից եմ նայում։ Այն տեսանկյունից, թե իսկ ո՞վ է այն պատասխանատուն, ով քայքայել է բանակցային ներուժը, տապալել է բանակցային գործընթացը, հրահրել է հասարակ, փոքր մարտական գործողություններով պատերազմ՝ 2020 թ-ի Տավուշյան մարտական գործողությունները։ Ո՞վ է պետությունը ներքաշել պատերազմի մեջ և պատերազմի ընթացքում ոչինչ չի արել պետությունը ռազմական ռելսերի վրա փոխադրելու համար, ո՞վ է, որ տեսնելով նահանջների, բարդակի շարանը, խրախուսել է տարբեր զինվորականների տարբեր շքանշաններ տալով․․․»,- մանրամասնեց Սեյրան Օհանյանը՝ հավելեկով, որ այս ամենի հիմնական պատասխանատուն իշխանություններն են Նիկոլ Փաշինյանի գլխավորությամբ, ով երկիրը խաղաղության կեղծ օրակարգով տանում է ադրբեջանա֊թուրքական խորամանկությունների ճիրանը։
Անդրադառնալով հարցին, որ ինքը ևս պատերազմի օրերին Շուշիում է եղել, հնարավոր է, ասենք, առնչություն է ունեցել Միքայել Արզումանյանի գործողությունների հետ, Սեյրան Օհանյանն ասաց, որ քննչական մարմիններին պետք է հարցնել։
Անդրադառնալով այն դիտարկմանը, որ Շուշիի «անկումը» պատերազմից հետո իր գրպանը ևս ուզում էին գցել, գեներալ-գնդապետն ասաց․
«Գիտեք, ամեն ինչ իրենց գրպանում է, իրենց աղքատ ուղեղներում է, չեն կարող ոչինչ ուրիշի գրպանը գցել։ Այդ ամենի պատասխանատուն Նիկոլ Փաշինյանն է»։
Սեյրան Օհանյանից հետաքրքվեցինք, թե արդյոք հնարավոր համարում է, որ նախկին պաշտոն զբաղեցրած այլ բարձրաստիճան զինվորականներ ևս բերման ենթարկվեն, օրինակ Օնիկ Գասպարյանը, Ջալալ Հարությունյանը, նա արձագանքեց․
«Իրենք շախմատաձև ձերբակալություններ են անում, և եթե հրամանատարական ուղղահայացի համաձայն լինի, առաջինը պետք է ձերբակալվի ամենավերևում կանգնած անձնավորությունը՝ Նիկոլ Փաշինյանը»,- շեշտեց նա։
Անի Գևորգյան