Այսօր հայտնի դարձավ, որ Արցախի նախագահ Արայիկ Հարությունյանը դիմել է Ազգային ժողովի նախագահին՝ ԱՀ Սահմանադրության փոփոխության նախագիծը վերադարձնելու նպատակով: Որպես պատճառ նշվում է այն, որ նման որոշման համար պատճառ են հանդիսացել Արցախի Հանրապետության սահմանադրական փոփոխության նախաձեռնության իրացման ընթացքում հնչած տարաբնույթ քաղաքական գնահատականները, ինչպես նաև նախագծի վերաբերյալ հանրության շրջանում առաջացած բացասական արձագանքները, ինչը կարող էր ներքին պառակտման ու լարվածության հերթական պատճառ դառնալ:
MediaHub-ի արցախյան աղբյուրները տեղեկացնում են, որ նախագահը իսկապես հղում է արել հասարակական կազմակերպությունների և արտախորհրդարանական ուժերի դժգոհություններին, այլ կերպ ասած՝ հասարակության դժգոհությանը: Բայց իր նեղ շրջապատում Արայիկ Հարությունյանն ասել է, որ իրականում ներկայում հրատապ խնդիր չկա նման փոփոխությունների, առավել ևս՝ արտահերթ ընտրությունների:
Մեր աղբյուրը նշեց, որ, փաստորեն, երբ ավելի վաղ ընդդիմությունը հայտարարում էր, որ ոչ թե Սահմանադրությունը խնդիրներ ունի, այլ նպատակը քաղաքական ինչ-ինչ գործընթացներն են, նրանք այնքան էլ չէին սխալվում: Իսկ հիմա, երբ, կարծես թե, Արցախի շուրջ գործընթացները որոշակիորեն սառեցված են և դրվել "պաուզայի" վրա, նման կտրուկ փոփոխությունների կարիքը հետաձգվում է և իշխանություններին միայն մնում է ձգել ժամանակը և սեփական պաշտոնավարման հարցին նման լուծում տալ: