Ուզում եմ մեկ նախազգուշացում անել ամերիկյան կողմին․ Իրանի գերագույն առաջնորդ
Իրանի գերագույն առաջնորդ, այաթոլլա Ալի Խամենեին խոսել է ԱՄՆ-ին Իրանի միջուկային ծրագրի շուրջ բանակցություններում «դատարկ խոսքերից» խուսափելու մասին։
«Զրույցը վերածվել է բանակցությունների. ես ուզում եմ մեկ նախազգուշացում անել ամերիկյան կողմին… Նրանք, ովքեր մասնակցում են այս անուղղակի բանակցություններին ԱՄՆ-ի անունից, պետք է խուսափեն դատարկ խոսակցություններից…»,- ասել է Խամենեին։
«Երբ նրանք ասում են, որ թույլ չեն տա Իրանին հարստացնել ուրան, դա ամբարտավանություն է։ Իսլամական Հանրապետությունը չի սպասում որևէ մեկի թույլտվությանը»։
«Մենք ունենք մեր սեփական քաղաքականությունը և մեր սեփական գիծը, որին հետևում ենք... Մեկ այլ անգամ ես կբացատրեմ Իրանի ժողովրդին, թե ինչու են արևմտյան և ամերիկյան ներկայացուցիչները այդքան համառորեն դեմ արտահայտվում Իրանի ուրանի հարստացմանը։ Մենք ձեզ կասենք, թե որոնք են նրանց իրական մտադրությունները», - ընդգծել է Իրանի գերագույն առաջնորդը՝ ելույթ ունենալով նախկին նախագահ Էբրահիմ Ռաիսիի և Իրանի այլ բարձրաստիճան պաշտոնյաների մահվան տարելիցի առթիվ կազմակերպված հիշատակի արարողության ժամանակ։
