Փաշինյանն այլեւս դադարել է վստահություն եւ հարգանք ներշնչել մոտ ու հեռու երկրների մոտ։

Հայաստանը, ցավոք, սկսել է ընկալվել որպես անկարևոր մի պետություն, որի լինելիության հարցն այսօր առկախված է օդում։ 

Խաղաղ պայմաններում 15 զինվորի մահ խլած ողբերգական հրդեից 4 օր անց ոչ մի բարեկամ երկրի ղեկավար ցավակցական զանգ կամ հեռագիր չի հղել Հայաստանի Հանրապետության կառավարությանը։ Լռում են անգամ պաշտոնական Փարիզը, Մոսկվան, Վաշինգտոնը։ Այո, ՀՀ-ում հավատարմագրված որոշ երկրների դեսպանություններ իրենց ֆեյսբուքյան էջում տեղադրեցին ցավակցական ուղերձներ, բայց պաշտոնական մակարդակով, կրկնենք, որևէ ցավակցական խոսք չստացվեց:

Չկա արձագանք նաև արտաքին գործերի նախարարների մակարդակով։ 

Գերտերությունների՝ դիվանագիտական հարթակում նման քար լռությունը խոսում է միջազգային դիվանագիտական ճակատում՝ ՔՊ-ական իշխանության խայտառակ վիճակի մասին։

Լուռ է նաև «մեր նոր բարեկամ» Թուրքիան. Հայաստան-Թուրքիա սիրախաղի ֆոնին Էրդողանը կամ Չավուշօղլուն «սոլիդարությունից» ելնելով անգամ չցավակցեցին՝ արհամարհական ապտակ հասցնելով Հայաստանի իշանություններին, ի դեմս Արարատ Միրզոյանի, ով նույն Թուրքիայում տեղի ունեցող վերջին ողբերգություններին արձագանքում է շտապ ցավակցական ուղերձներով: 

Մինչդեռ թերեւս 5 տարի առաջ որևէ մեկի մտքով չէր անցնի  Թուրքիայից «համերաշխության» մեսիջներ ակնկալելը, երբ դեռ այս իշխանությունները չէին հայտնվել Հայաստանի ղեկին։ Այսօր, այո, սին պատրանքներով տարված Արարատ Միզոյանը խաղաղության դարաշրջան բացելու փաշինյանական ուղեգծի մեջ ցավակցում է Թուրքիայում տեղի ունեցող մահվան ելքով դեպքերին։

Վերջինը 3 ամիս առաջ էր, երբ Միրզոյանը թվիթերյան էջում իր ցավակցությունները հայտնեց Ստամբուլում առնվազն 6 մարդու կյանք խլած պայթյունի կապակցությամբ։ 

«Անկեղծ ցավակցություններս եմ հայտնում Ստամբուլում տեղի ունեցած մահաբեր պայթյունի զոհերի ընտանիքներին, իսկ վիրավորներին մաղթում եմ շուտափույթ ապաքինում», - գրել էր Միրզոյանը։ 

Թուրքիայի արտաքին քաղաքական գերատեսչության ղեկավարն էլ թվիթերյան գրառմամբ արձագանքեց՝ շնորհակալություն հայտնելով Հայաստանի ԱԳՆ ղեկավարին։ 

Բայց կա մի բայց.  ինչո՞ւ մեղադրել այլոց, երբ սգատերն անգամ խրախճանքի մեջ է։ Մամուլն այսօր գրեց, որ Ներքին գործերի նախարարության ոստիկանության պարեկային ծառայության Արագածոտնի, Կոտայքի, Գեղարքունիքի եւ Տավուշի մարզերի ստորաբաժանումների աշխատանքի մեկնարկին նվիրված միջոցառումներից հետո Փաշինյանն իր թիմակիցների հետ օրվա ավարտին ռեստորաններից մեկում մի լավ կեր ու խում է արել։ Մեկնաբանություններն, ինչպես ասում են, ավելորդ են:

Լիա Սարգսյան