Երեկ ՊՆ կամազի կողաշրջման հետևանքով վիրավորում ստացած յոթ զինծառայողները շարունակում են բուժում ստանալ ՊՆ կայազորային հոսպիտալում։ Այդ մասին MediaHub.am-ի հետ զրույցում ասաց ՊՆ մամուլի քարտուղար Արամ Թորոսյանը։ Նա տեղեկացրեց, որ զինծառայողներից որևէ մեկի կյանքին վտանգ չի սպառնում, տղաները շարունակում են ստանալ անհրաժեշտ բուժօգնություն։
Հիշեցնենք, որ երեկ՝ նոյեմբերի 16-ին՝ ժամը 09:50-ի սահմաններում, ՀՀ ՊՆ «Կամազ» մակնիշի ավտոմեքենայի կողաշրջման հետևանքով մահացել է զինծառայող Գրիգոր Արթուրի Գրիգորյանը (ծնված՝ 2000թ.): Ըստ պաշտոնական հաղորդագրության՝ վթարի հետևանքով մարմնական վնասվածքներ են ստացել 7 զինծառայողներ, որոնք տեղափոխվել են կայազորային հոսպիտալ, հետազոտվել են և ստանում են անհրաժեշտ բուժօգնություն։
Նշենք, որ դեպքի առնչությամբ ՔԿ-ն հաղորդագրություն է տարածել, ըստ որի՝ նախնական տվյալներով, 2022 թվականի նոյեմբերի 16-ին ՀՀ ՊՆ N զորամասի պարտադիր ժամկետային զինծառայողը իր կողմից վարած «Կամազ» մակնիշի ավտոմեքենայով, անձնակազմին զորամասից կրակային դիրք տեղափոխելու ճանապարհին, խախտել է տրանսպորտային մեքենա վարելու կանոնը, որի արդյունքում մեքենան կողաշրջվել է, ինչի հետևանքով զինծառայողներից մեկը ստացած մարմնական վնասվածքներից մահացել է, իսկ մյուսները ստացել են տարբեր մարմնական վնասվածքներ և տեղափոխվել են կայազորային զինվորական հոսպիտալ:
Նարե Գնունի