Սերբիայի գործող նախագահ Ալեքսանդր Վուչիչն ու իշխող Սերբական առաջադիմական կուսակցությունն առաջատար են պետության ղեկավարի և Սկուպշչինայի (խորհրդարանի) ընտրություններում։ Այս մասին են վկայում Հանրապետական ընտրական հանձնաժողովի տվյալները քվեաթերթիկների 44,5 տոկոսի հաշվարկի արդյունքներով, փոխանցում է RIA Novosti-ն։
Վուչիչն այս պահի դրությամբ ստացել է ընտրողների ձայների 63,42 տոկոսը։ Երկրորդ տեղում Զդրավկո Պոնոշն է՝ ընտրողների 14,59 տոկոսի աջակցությամբ։ Վուչիչն արդեն հայտնել է, որ պահպանելու է հանրապետության չեզոք կարգավիճակը և խոստացել բարեկամական հարաբերություններ պահպանել Ռուսաստանի հետ։
Նշվում է, որ «Ալեքսանդր Վուչիչ-Միասին կարող ենք ամեն ինչ» քաղաքական բլոկը խորհրդարանական ընտրություններում ստացել է 46,35 տոկոս ձայն։ Խորհրդարան անցնելու համար անհրաժեշտ 3 տոկոսի շեմը հաղթահարել է ևս 6 բլոկ։
Ընտրություններին մասնակցությունը կազմել է ավելի քան 58 տոկոս։
Սերբիայի ընտրական հանձնաժողովն ավելի վաղ գրանցել էր Սկուպշչինայի 250 տեղերին հավակնող 19 կուսակցությունների բլոկ և կոալիցիա։ Պետության ղեկավարի պաշտոնին հավակնում է 8 թեկնածու։