Հայաստանի առաջին տիեզերական արբանյակի ձեռքբերումն այս իշխանությունը որպես իրենն է ցույց տալիս, ոչ, սրանք այս իշխանության ձեռքբերումները չեն, նրանք, ուրիշի աշխատանքն ուշացնելով, իրենց տիեզերական ձեռքբերումն են համարում։ Այս մասին այսօր MediaHub.am-ի հետ զրույցում ասաց վարչապետի՝ ավիացիայի գծով նախկին խորհրդական Հակոբ Ճաղարյանը։

Հիշեցնենք, որ Երկիր մոլորակի ուղեծիր է դուրս բերվել Հայաստանի Հանրապետության առաջին տիեզերական արբանյակը: Այս մասին այսօր Կառավարության նիստի ընթացքում հայտարարեց վարչապետ Նիկոլ Փաշինյանը։ Փաշինյանը ներկայացրեց մանրամասները նշելով՝ «2022 թվականի մայիսի 25-ին Երևանի ժամանակով 22:35-ին ԱՄՆ-ի Կանավերլ հրվարդանում գտնվող տիեզերակայանից Space X ընկերության տիեզերանավով երկիր մոլորակի ուղեծիր է դուրս բերվել Հայաստանի առաջին տիեզերական արբանյակը»:

«Արբանյակի ամբողջ պատմությունը չգիտեմ, բայց այն, ինչ կապված է տիեզերքի և ավիացիայի հետ, տրամաբանորեն միշտ իմ ուշադրության կենտրոնում է գտնվել։ Դեռ 2000-ական թվականներից արբանյակի ստեղծման տեղեկությունները կային մամուլում։ Սերժ Սարգսյանի երկրորդ նախագահության շրջանում կոնկրետ գործողություններ են կատարվել այս ուղղությամբ»,- մեկնաբանեց նա։

Նշենք, որ մայիսի 25-ին Երկրի ուղեծիր են դուրս բերել 59 փոքր արբանյակներ, այդ թվում` հայկականը։ Ճաղարյանը վստահեցրեց՝ մեկ արբանյակը չի բավարարի նույն տարածքի մշտադիտարկման համար։

«Ծրագրում, եթե չեմ սխալվում, 5 կամ 7 արբանյակ էր նախատեսվում, հիմա այդ 5-7-ից միայն մեկն է գնացել։ Կրկնում եմ՝ սա այս իշխանության ձեռքբերումը չէ, իրենք ամեն ինչ «մենք» են անում, ասում են՝«ապրի Կառավարությունը, տեսեք՝ ինչ լավ բան են արել». ախր, դուք չեք արել, ձեր արածը չէ»,- ընդգծեց քաղավիացիայի մասնագետը։

Լիաննա Թորոսյան