Արցախցիների «նիկոլական» թևը սպառնացել է սադրանքներ հրահրել, եթե հարթակից գերիների թեմայով պահանջներ հնչեն

Շաբաթ օրը՝ մարտի 29-ին, արցախցիները մեծ հանրահավաք են պատրաստվում անել Երևանում։

Առիթն Արցախը հանձնած Նիկոլ Փաշինյանի կառավարության և դրա մաս կազմող Աշխատանքի և սոցիալական հարցերի նախարարության նոր որոշումն է, որով Արցախից բռնի տեղահանված տասնյակ հազարավոր քաղաքացիներ զրկվել են կառավարության տրամադրած 40+10 հազար դրամ աջակցությունից։ Այս ծրագիրը հունվար ամսից այլևս չի գործում, փոխարենը մեկնարկել է մեկ շնչին 50 հազար դրամ աջակցության ծրագիրը, որը ապրիլից բոլորին չէ, որ հասանելի է լինելու, այլ միայն խոցելի խմբերի շահառուներին։ Եվ հենց այս որոշումն էլ բորբոքել է առանց այդ էլ այս կառավարության «թեթև ձեռքով» բազմաթիվ զրկանքներ կրած արցախցիների կրքերը։ Նրանք որոշել են շաբաթ օրը հանրահավաք հրավիրել և իրենց բողոքն ու պահանջները ներկայացնել կառավարությանը։

MediaHub-ի տեղեկություններով՝ արցախցիների պրոիշխանական կամ «նիկոլական» թևը, որը համակերպվել է այս իշխանությունների կողմից Արցախի հանձնման հետ, դեռ մի բան էլ նիկոլական տրամաբանությամբ համարում է, որ «Արցախը նախկիններն են հանձնել», օրերս հանդիպում են ունեցել արցախցիների ընդդիմադիր թևի հետ, որոնք նախաձեռնել են այս հանրահավաքը և նախազգուշացրել, որ հանրահավաքի ընթացքում հանկարծ Բաքվում պահվող գերիների հարցը չբարձրացնեն, այլ խոսեն միայն սոցիալական թեմաներից։

Մեզ ասացին՝ նրանք սպառնացել են, որ եթե հանկարծ գերիների թեմայով ելույթներ, պահանջներ հնչեն, իրենք՝ այդ «նիկոլական» թևի արցախցիները, շարքերի միջից սադրանքներ կհրահրեն, կգոռգոռան, թե իբր «Բաքվում գտնվող այդ գերիների պատճառով է այս ամենը եղել», «նրանք թալանել են Արցախը, դրա համար էլ այսօր Արցախը մերը չէ» ու այսպիսի կեղծ, նիկոլական թեզեր։ 

Կտրվե՞ն, արդյոք, արցախցիները այս շանտաժին ու սպառնալիքներին, թե՞ ոչ, կերևա մարտի 29-ի հանրահավաքի ժամանակ։

Վահե Մակարյան