Ֆրանսիան եւ Գերմանիան պարտավորվել են գործել միասին, որպեսզի պաշտպանվեն գների կտրուկ աճից, ինչպես նաեւ օգտագործել ֆիսկալ քաղաքականությունը ռեկորդային բարձր գնաճի դեմ պայքարի համար, տեղեկացրել է Reuters-ը։

Ֆրանսիայի ֆինանսների նախարար Բրունո լը Մերը եւ նրա գերմանացի գործընկեր Քրիստիան Լինդները միասնություն են հանդես բերել Պրահայում եվրոգոտու ֆինանսների նախարարների բանակցությունների սկզբում՝ լրագրողներին ասելով, որ համագործակցելու են քաղաքականության հարցերում։ «Դա ազդանշան է այն մասին, որ Ֆրանսիան եւ Գերմանիան այդ հանդիպումը միասին են սկսում։ Դա ազդանշան է այն մասին, որ մենք ուս ուսի տված՝ կանգնած ենք ոչ միայն այստեղ, այլեւ քաղաքական առումով»,- ասել է Լինդները։

«Որպես ֆինանսների նախարարներ մենք նաեւ պետք է կատարենք մեր պարտականությունները»,- ասել է Լինդները։ «Եվրոպական կենտրոնական բանկը ուժեղ ազդանշան է տվել՝ պայքարելու գնաճի դեմ։ Այնպես որ, նաեւ մեր պարտքն է պայքարել գնաճի դեմ ֆիսկալ քաղաքականության օգնությամբ»,- ասել է նա։

«Մենք կպաշտպանենք մեր տնային տնտեսությունները բարձր գների հետեւանքներից։ Մենք պետք է նույնն  անենք մասնավոր ընկերությունների համար, որոնք տուժել են գազի եւ էլեկտրաէներգիայի բարձր գներից»,- ասել է լը Մերը։

Ֆրանսիան, Գերմանիան եւ այլ երկրներ հայտարարել են բազմամիլիարդանոց փաթեթների մասին, որպեսզի օգնեն բիզնեսին եւ սպառողներին՝ հաղթահարել գնաճը։ Bruegel վերլուծաբանական կենտրոնի գնահատականներով՝ ԵՄ-ի պետական աջակցությունն արդեն հասել է 282 մլրդ եվրոյի, եւ սպասվում է ավելին։

Բայց աջակցությունն ինքնին կարող է սնել գնաճը՝ արատավոր շրջան ստեղծելով։ Եվրոգոտու ֆինանսների նախարարները կքննարկեն, թե ինչպես համակարգեն քաղաքականությունը, որպեսզի կանխեն դա։

«Դրանք դժվար քննարկումներ են, բայց ես համոզված եմ, որ կգտնենք ընդհանուր լուծում, որը մեզ պետք է»,- ասել է Էստոնիայի ֆինանսների նախարար Քեյթ Պենտուս-Ռոզիմանուսը։