ԵՄ երկրների և կառավարությունների ղեկավարները կձգտեն մեծացնել պատժամիջոցների ճնշումը Ռուսաստանի վրա՝ Ուկրաինայում հատուկ ռազմական գործողությունը դադարեցնելու համար։ Այս մասին ասվում է Բրյուսելում ուրբաթ օրը հրապարակված նրանց հայտարարության մեջ, փոխանցում է ՏԱՍՍ-ը։
«Եվրամիությունը կաջակցի և կձգտի, խորհրդակցելով միջազգային գործընկերների հետ, ավելի մեծացնել հավաքական ճնշումը Ռուսաստանի վրա: Եվրամիությունը պատրաստ է շարունակել ուժեղացնել իր սահմանափակող միջոցները` սերտ համակարգելով և համագործակցելով համաշխարհային գործընկերների հետ: Միջոցառումները [պատժամիջոցները] շրջանցելու դեմ կուժեղացվեն», - նշվում է դրանում։
Փաստաթղթում ընդգծվում է, որ «Եվրամիությունը աջակցություն կտրամադրի Ուկրաինային այնքան ժամանակ, որքան դա կպահանջվի»։ Գագաթնաժողովի մասնակիցները վերահաստատել են իրենց հանձնառությունը՝ ընդլայնելու Ուկրաինային ռազմական և ֆինանսական օգնությունը։ Փաստաթղթում նշվում է, որ Եվրամիության և նրա անդամ երկրների ընդհանուր օգնությունը Կիևին հակամարտության սկզբից ի վեր կազմել է 67 միլիարդ եվրո, որից զենքի մատակարարումները գնահատվում են 12 միլիարդ եվրո։
ԵՄ առաջնորդները նաև խոստացել են սկսել վիրավոր ուկրաինացի զինվորների բուժման և վերականգնման ծրագիր՝ քաղաքացիական կյանքում նրանց հետագա վերաինտեգրման համար: ԵՄ գագաթնաժողովը պետք է տևեր երկու օր, սակայն, ինչպես հայտարարել է Եվրոպական խորհուրդը, երկրորդ օր չի լինելու։ Ուկրաինայի նախագահ Վլադիմիր Զելենսկին հրավիրվել է համայնքի երկրների ղեկավարների հանդիպմանը։