ԱՄՆ պետքարտուղար Էնթոնի Բլինքենը դեսպան Ֆիլիպ Ռիքերին նշանակել է Կովկասյան բանակցությունների գծով ավագ խորհրդական և ԵԱՀԿ Մինսկի խմբի համանախագահ: Բլինքենը նշել է, որ դեսպան Ռիքերի նշանակումը վերահաստատում է ԱՄՆ հանձնառությունը Հարավային Կովկասում հակամարտությունների խաղաղ կարգավորման գործում: Ռիքերը ոչ միայն լինելու է ՄԽ համանախագահ, այլև աշխատելու է «Ժնևյան միջազգային քննարկումների» ձևաչափում, որպես ԱՄՆ ներկայացուցիչ: 

Պետդեպարտամենտի հաղորդագրությունում էլ նշվում է, որ Միացյալ Նահանգները հանձնառու է՝ օգնել Հայաստանին և Ադրբեջանին բանակցել Լեռնային Ղարաբաղի հակամարտության երկարաժամկետ քաղաքական կարգավորման շուրջ: Եվ, որ դեսպան Ռիքերը նաև կհամագործակցի համախոհ գործընկերների հետ, ինչպիսին է Եվրամիությունը, և որպես ԵԱՀԿ Մինսկի խմբի համանախագահ կօգնի հեշտացնել Հայաստանի և Ադրբեջանի միջև ուղիղ երկխոսությունը: Հաղորդագրությունում ասվում է, որ դեսպան Ռիքերի նշանակումն այս ժամանակահատվածում վերահաստատում է նաև Վրաստանի վերաբերյալ Ժնևյան քննարկումներում Միացյալ Նահանգների դերի կարևորությունը: 

Ֆիլիպ Ռիքերը դիվանագիտական աշխատանքի մեծ փորձ ունի Եվրոպայում և միջազգային կազմակերպություններում: Նա ծառայել է Միացյալ Թագավորությունում Ամերիկայի Միացյալ Նահանգների դեսպանատանը որպես Սենտ Ջեյմսի դատարանի գործերի ժամանակավոր հավատարմատար: 2019 թվականի մարտից մինչև 2021 թվականի օգոստոսը դեսպան Ռիկերը եղել է Եվրոպայի և Եվրասիայի հարցերով պետքարտուղարի օգնականի պաշտոնակատարը։ Մինչ Բյուրոն ղեկավարելը, դեսպան Ռիկերը եղել է Գերմանիայի Շտուտգարտ քաղաքում ԱՄՆ Եվրոպական հրամանատարության հրամանատարի քաղաքացիական հարցերով տեղակալ և քաղաքականության հարցերով խորհրդական: Ավելի վաղ նա ծառայել է նաև Միլանում որպես Միացյալ Նահանգների գլխավոր հյուպատոս և եղել է Պետքարտուղարի տեղակալի օգնականը, զբաղվել է Բալկանների, Կենտրոնական Եվրոպայի և Հոլոքոստի հարցերով: 2008-2011 թվականներին եղել է Հյուսիսային Մակեդոնիայում ԱՄՆ դեսպանը։

Ուշագրավ է, որ ԱՄՆ-ն նման պաշտոնի չի նշանակել դիվանագետի, ով հետխորհրդային երկրներում աշխատանքի փորձ ունի: Թերևս ԱՄՆ-ն այս կերպ ավելի է ընդգծում այն, որ իր քաղաքական կուրսը Հարավային Կովկասի տարածաշրջանում թևակոխում է նոր փուլ, հետաքրքրությունների ավելի լայն շրջանակով:

Ռեբեկա Հովհաննիսյան