Խաղաղապահներ ուղարկելը չի կարող խաղաղություն ապահովել Ուկրաինայում և կարող է նաև ուղղակի հակամարտություն հրահրել ՆԱՏՕ-ի և Ռուսաստանի միջև։ Այս մասին TVN24-ի եթերում հայտարարել է Լեհաստանի պաշտպանության նախարարության ղեկավար Վլադիսլավ Կոսինյակ-Կամիշը։
«Զինվորականների ներկայությունը խաղաղություն չի երաշխավորում»,- նշել է Կոսինյակ-Կամիշը։
Որպես իր խոսքի փաստարկ նա բերել է Լիբանանում ՄԱԿ-ի ժամանակավոր ուժերի օրինակը. «Եթե նայեք Լիբանանում ՄԱԿ-ի առաքելությանը, զինվորները խաղաղության երաշխիք չեն: Լիբանանում կա ՄԱԿ-ի առաքելություն, որին մենք նույնպես մասնակցում ենք մի քանի տասնյակ պետությունների հետ, և այդ առաքելությունը խաղաղություն չի ապահովել նույնիսկ այն գծում, որտեղ նրանք տեղակայվում են»,- պարզաբանել է նախարարը:
Բացի այդ, նախարարն ընդգծել է, որ ՆԱՏՕ-ի, հատկապես լեհական ուժերի ներկայությունը Ուկրաինայում կարող է ուղղակի զինված հակամարտություն հրահրել Մոսկվայի և դաշինքի միջև։