Միացյալ Նահանգները նոր պատժամիջոցներ կկիրառի Ռուսաստանի դեմ, եթե Ուկրաինայում հրադադար չհաստատվի մինչև օգոստոսի 8-ը, երբ լրանա տասնօրյա վերջնագրի ժամկետը։ Այս մասին լրագրողներին հայտարարել է ԱՄՆ նախագահ Դոնալդ Թրամփը։
«Պատժամիջոցներ կլինեն, բայց, կարծես, նրանք բավականին հաջողակ են դրանցից խուսափելու հարցում։ Գիտեք, նրանք խորամանկ մարդիկ են, և նրանք բավականին հաջողակ են դրանցից խուսափելու հարցում, այնպես որ կտեսնենք, թե ինչ կստացվի դրանից», - ասել է հանրապետականը։
Այսպես է պատասխանել ԱՄՆ նախագահը այն հարցին, թե ինչ կլինի օգոստոսի 8-ին, եթե Ուկրաինայում հրադադարի վերաբերյալ համաձայնագիր չհաստատվի։
Հուլիսի կեսերին Թրամփը հայտարարել էր, որ եթե Ուկրաինայում հակամարտության կարգավորման հարցում 50 օրվա ընթացքում առաջընթաց չլինի, ԱՄՆ-ն երկրորդական մաքսատուրքեր կսահմանի այն երկրների համար, որոնք Ռուսաստանից ածխաջրածիններ են գնում։ Ավելի ուշ նա վերջնագրի ժամկետը կրճատել էր մինչև տասը օր՝ մինչև օգոստոսի 8-ը։